VOV4.Jarai - Mơguah lơ 6/5, ƀơi tơring glông Củ Chi, Khua mir sir dêh čar ta ơi Nguyễn Xuân Phúc hrom hăng hơdôm mơnuih tơbiă anăn khua pơ ala mơnuih ƀôn sang dêh čar ta tal 15, anom bruă ruah khua mrô 10 (tơring glông Củ Chi, Hóc Môn) hmâo nao pơhmư̆ jơnum lăi pơhing kơ tơlơi bơwih ƀong – bôh thâo mơnuih mơnam – pơgang rơnuk rơnua plơi pla lŏn ia truh mơnuih tơbiă anăn kơ khua pơ ala mơnuih ƀôn sang dêh čar ta tal 15 hăng khua pơ ala Jơnum min pơ ala mơnuih ƀôn sang ƀôn prong Hồ Chí Minh rơwang bruă 2021-2026. Jơnum pơphun hlâo kơ 3 hrơi hlâo kơ jơnum pơbưp kơplah wah mơnuih tơbiă anăn kơ khua pơ ala mơnuih ƀôn sang dêh čar tal 15, anom bruă ruah khua mrô 10 hăng mơnuih ruah khua. Jơnum kiăng lăi pơhing kơ ƀing tơbiă anăn tơlơi bơwih ƀong mơnuih mơnam, pơgang lŏn ia, rơnuk rơnua plơi pla mơng tơring glông Củ Chi, Hóc Môn rơwang bruă phrâo rơgao, pơsit jơlan gah pơđĭ kyar pơ̆ anăp anai. Hrom hăng anun, amăng mông jơnum ăt amra bơkơtuai mơn hăng lăi pơthâo dong hơdôm bôh yôm hăng hơdôm mơnuih tơbiă anăn đing nao kiăng ba mut jơlan hơdră bruă ngă rơđah rơđông. Amăng jơlan hơdră ngă bruă, Khua mir sir dêh čar ta ơi Nguyễn Xuân Phúc brơi thâo ư-ang biă Khul wai lăng bruă ruah khua pơ ala mơnuih ƀôn sang lăi pơthâo khua pơ ala mơnuih ƀôn sang tal 15 ƀơi ƀôn prong Hồ Chí Minh. Tơdah dưi hmâo mơnuih ƀôn sang ruah, ñu amra gir run abih pran jua pô mă bruă kơ lŏn ia, kơ mơnuih ƀôn sang./.

Siu H’ Prăk: Pô pơblang