VOV4.Jarai - Ngă tui jơlan hơdră pơsur mơnuih ruah khua hlâo kơ ruah khua pơ ala mơnuih ƀôn sang dêh čar ta tal 15 hăng khua pơ ala Khul pơ ala mơnuih ƀôn sang rơwang bruă 2016-2021, amăng dua hrơi lơ 9 hăng lơ 10/5, Khua mir sir dêh čar ta ơi Nguyễn Xuân Phúc hăng ƀing tơbiă anăn hmâo bưp laih mơnuih ƀôn sang ƀơi dua bôh tơring glông Củ Chi hăng Hóc Môn, ƀôn prong Hồ Chí Minh. Lăi pơdah jơlan hơdră ngă bruă mơng pô, Khua mir sir dêh čar ta ơi Nguyễn Xuân Phúc lăi lĕ, bruă mă ba jơlan hlâo mơng ƀing tơbiă anăn dưi ruah ngă Khua pơ ala mơnuih ƀôn sang dêh čar, khua pơ ala Khul pơ ala mơnuih ƀôn sang lĕ khom hmư̆ tơlơi pơmin, tơlơi čang rơmang mơng mơnuih ruah khua, lăi nao hmao tlôn truh hăng Khua pơ ala mơnuih ƀôn sang dêh čar, Khul pơ ala mơnuih ƀôn sang hăng hơdôm ƀirô apăn bruă kiăng gum hơgô̆p pơdŏng lŏn ia hăng ƀôn prong Hồ Chí Minh thâo rơgơi, pơplih phrâo, thâo tơngiă, djă pioh hơdôm nua yôm bôh thâo đưm. Pơ ala kơ ƀing tơbiă anăn, Khua mir sir dêh čar ta ơi Nguyễn Xuân Phúc čang rơmang ƀing dưi ruah ngă khua pơ ala mơnuih ƀôn sang khom gum hơgô̆p kiăng dua bôh tơring glông tañ jing quận gah ƀôn prong. Hăng Củ Chi, Khua mir sir dêh čar ta lăi lĕ, ƀing tơbiă anăn dưi ruah ngă khua khom đing nao pơplih phrâo hơdră đĭ kyar, amăng anun khom pơđĭ kyar bruă bơwih ƀong sĭ mơdrô, ƀôn prong klă hiam, ngă brơi Củ Chi jing quận gah kơtuai guai mơng ƀôn prong Hồ Chí Minh./.

Siu H’ Prăk: Pô pơblang