VOV4.Jarai - “Hơdôm anom bruă ling tơhan khom ngă gru, ngă tui bruă pla kyâu hơpă klă phun anun, kơsem min klă bruă pla phun kyâu prong kiăng pơgang rơhuông adai lŏn mơnai sui thun. Ngă tui dong bruă mă mơng hơdôm grŭp bơwih ƀong, pơgang lŏn ia hăng hơdôm bôh anom hmâo anô̆ gal gah lŏn drŏn, anih anom pioh pla kyâu, pơlar dlai klô”. Anai lĕ tơlơi rơkâo mơng Khua mir sir dêh čar ơi Nguyễn Xuân Phúc pioh kơ hơdôm puih kơđông khul ling tơhan amăng mông ngă Lơphet pok phun pla kyâu hơdor na nao kơ Wa Hồ yua kơ Ding jum khul ling tơhan pơphun mơguah lơ 13/4 ƀơi kual djă pioh gru grua đưm K9-Đá Chông, Ba Vì, Hà Nội. Tui hăng tơlơi lăi pơthâo glăi mơng Ding jum khul ling tơhan, amăng rơwang mơng thun 2015-2020, abih bang ling tơhan hmâo pla laih giăm truh 11 klăk phun kyâu mơtah djop mơta. Dong mơng akô̆ thun truh ră anai hơdôm bôh puih kơđông ling tơhan hmâo pla laih 1 klăk 500 rơkâo ƀĕ phun kyâu, 737 ektar đang kyâu, đĭ giăm truh 2,7 wot bơhmu hăng thun hlâo. Abih bang khul ling tơhan hrưn đĭ amra ngă giong kơčăo bruă pla 3 klăk 300 rơbâo ƀĕ phun kyâu hăng sa rơbâo 785 ektar đang kyâu amăng thun anai. Khua mir sir dêh čar ta rơkâo Ding jum khul ling tơhan  đing nao pơtrut kơtang bruă lăi pơhing amăng mơnuih ƀôn sang, amăng mơnuih apăn bruă tơhan, ling tơhan kơ bruă mă, bôh tŭ yua mơng pla kyâu, pla dlai, hrom hăng anun pok pơhai ba glăi bôh tơhnal jơlan hơdră 1 klai ƀĕ phun kyâu – yua kơ sa Việt Nam mơtah hăng hơdôm kơčăo bruă mă rơđah rơđông sit nik./.

Siu H’ Prăk: Pô pơblang