VOV4.Jarai - Lơ 16/4, ƀơi Ƀirô mă bră, Khua mir sir dêh čar ta ơi Nguyễn Xuân Phúc tŭ jum Khua anih jưh pơ ala dêh čar Mi Daniel Kritenbrink nao bưp hăng mơ-it hră pơpŭ mơng Khua mir sir Mi ơi Joe Biden mơ-it kơ Khua mir sir dêh čar ta ơi Nguyễn Xuân Phúc lơ̆m khua mir sir hơmâo Khua pơ ala mơnuih ƀon sang dêh čar ruah đĭ ngă khua mir sir dêh čar Việt Nam hăng ñu nao kuh, mă tơngan hlâo kơ abih bruă pơ dêh čar ta.

Amăng mông bưp, Khua mir sir dêh čar ta ơi Nguyễn Xuân Phúc lăng yôm hơdôm tơlơi gum pơgôp mơng Khua anih jưh pơ ala dêh čar Mi kiăng kơ ngă tơlơi tô nao rai dua bơnah tŏ tui hiam klă, hơđong, jai hrơi kjăp tui pran jua luă gŭ tơlơi dưi, rơngai, bruă kơđi čar hăng ba glăi tơlơi dưi hrŏm mơng dua bơnah. Khua mir sir pơpŭ kơ Khua anih jưh pơ ala dêh čar Mi Daniel Kritenbrink lơ̆m hơmâo khua mir sir Mi đăo gơnang, ruah ngă khua djru bruă pơtom hiăp djru bruă ƀơi kual Đông Á - Thái Bình Dương, laih dong čang rơmang lơ̆m ngă bruă phrâo, Khua anih jưh pơ ala dêh čar Mi amra tŏ tui dong yua tơlơi rô nao rai kơplah wah Mi - Việt Nam.

Siu Đoan: Pơblang