VOV4.Jarai-Mơguah tom brơi, lơ 21/4, jing lơ 10/3 blan tơƀang, ƀơi anih gru grua phun dêh čar ta či Pra yang pơtao Hùng, plơi prong Việt Trì, tơring čar Phú Thọ, hơmâo pơphun ngă yang h’ŭ kơ bruă mă akŏ pơdong lŏn ia mơ̆ng hơdôm rơnuk pơtao Hùng. Khua mir sir ơi Nguyễn Xuân Phúc nao jơnum hrom čuh ñang h’ŭ. Nao hrom hơmâo hơdôm ding kơna ding jum kơđi čar, Khua gum bruă git gai ping gah ơi Võ Văn Thưởng; ding kơna ding jum kơđi čar, Khua anom pơphun bruă ping gah yă Trương Thị Mai; hơdôm khua mua, khua hơđăp ping gah, kơnuk kơna; khua mua hơdôm ding jum anom bruă, tơring čar.

Hrơi huă pơsat pơtao Hùng Vương jing hrơi ngă yang prong, pơpŭ bơni hơdor glăi pran jua mă bruă akŏ pơdong lŏn ia mơ̆ng hơdôm rơnuk ơi pơtao Hùng.

Giong ngă yang čuh ñang pơ pra yang gah ngŏ kơčong čư̆, Khua mir sir ơi Nguyễn Xuân Phúc hăng Grup nao dưm bơnga amăng pơsat jep Hùng Vương. Guang bơnga hơmâo boh hră čih: Hơdor na nao kơ hơdôm rơnuk pơtao Hùng hơmâo pran jua tuh rơyuh kơ bruă man pơdong lŏn ia.

Giong anun, Khua mir sir hăng Grup nao dưm guang bơnga ƀơi gong rup trah W Hồ dŏ ră ruai hăng khua mua ling tơhan Đại đoàn quân Tiên Phong.

Nay Jek: Pơblang