VOV4.Jarai-Tui hăng tơlơi lăi pơthâo mơ̆ng Ding jum pơtom hiăp, lơ 19/4 ƀơi Hà Nội, tui hăng bruă jao ngă Khua Khul pơgang tơlơi rơnuk rơnua, Sang gum hơbit djop dêh čar blan 4/2021, Khua mir sir ơi Nguyễn Xuân Phúc git gai jơnum khua mua pơprong lăi nao kơ bruă “Kơtưn ngă hrom kơplah wah Sang gum hơbit djop dêh čar hăng djop khul bruă amăng kual kiăng pơtrrut tui ngă kjăp tơlơi đăo kơnang hăng bưp nao rai pơgăn, pơsir tơlơi rung răng” tui hơdră ngă hrom jơnum mơ̆ng ataih hăng bưp nao rai.

Khua mir sir ơi Nguyễn Xuân Phúc

Anai lĕ bruă mă yom biă mă mơ̆ Việt Nam git gai lơ̆m ngă khua Khul pơgang tơlơi rơnuk rơnua Sang gum hơbit djop dêh čar, anom bruă hơmâo tơlơi dưi prong hloh mơ̆ng Sang gum hơbit djop dêh čar kiăng pơgăn tơlơi blah ngă, rung răng, djă bong tơlơi rơnuk rơnua jar kmar.

Kơ-iăng Khua ding jum pơtom hiăp, ơi Đặng Hoàng Giang brơi thâo, Việt Nam git gai hăng akŏ pơjing hur har bruă mă brơi ngă tui djơ̆ tơlơi pôr mơ̆ng Sang gum hơbit djop dêh čar hăng djop khul bruă amăng kual, pơgăn, pơsir tơlơi rung răng blah ngă.

Tơlơi pôr hrom anai yom biă mă, lăi pơtong tơlơi pơtrun mơ̆ng Sang gum hơbit djop dêh čar djă bong kjăp pơgang tơlơi rơnuk rơnua, khom pơpŭ tơlơi phiăn jar kmar hăng Tơlơi phiăn phun mơng Sang gum hơbit djop dêh čar.

Nay Jek: Pơblang