VOV4.Jarai - Khua mir sir ơi Nguyễn Xuân Phúc phrâo nao čuă să plơi pla phrâo Tứ Xã, tơring glông Lâm Thao, tơring čar Phú Thọ. Pơtŏng glăi amăng thun blan rơgao, Ping gah, gong gai hăng mơnuih ƀon sang să hơmâo gum pơgôp, thâo pơčeh phrâo, pơhrui djŏp tơlơi hơmâo pioh man pơdong plơi pla phrâo hăng dưi ngă giong amăng kơnong 4 thun đôč, Khua mir sir git gai să Tứ Xã, tơring glông Lâm Thao hăng tơring čar Phú Thọ kơsem min bruă pơđĭ kyar să plơi pla phrâo ngă gru plơi prong kiăo tui boh thâo ia rơgơi hăng lăp djơ̆ hăng akŏ bruă pơđĭ kyar bơwih ƀong huă - mơnuih mơnam. Hlâo či bưp mơnuih ƀon sang să Tứ Xã ƀơi ƀut plơi mrô 7, Khua mir sir ơi Nguyễn Xuân Phúc nao čuă lăng hơdôm ring bruă kah hăng sang čơ, tơdron bơkơjăp drơi jăn, jơlan nao rai amăng să. Pơ ala kơ Ping gah, Kơnuk kơna, Khua mir sir ơi Nguyễn Xuân Phúc hơ-ơč hmưi kơ Ping gah, gong gai hăng mơnuih ƀon sang să Tứ Xã, tơring glông Lâm Thao kơ hơdôm tơlơi dưi ngă amăng bruă man pơdong plơi pla phrâo thun blan rơgao. Khua mir sir ăt bơni biă kơ tơring čar Phú Thọ amăng bruă pơđĭ kyar abih bang bơwih ƀong huă, mơnuih mơnam, gơñăm nao man pơdong plơi pla phrâo.

Khua mir sir ơi Nguyễn Xuân Phúc hok mơ-ak tơña bla mơnuih ƀon sang.

Siu H’Mai: Pơblang