VOV4.Jarai - Tŏ tui jơlan hơdră jơnum lok 11, Khua pơ ala mơnuih ƀon sang dêh čar tal 14, hrơi anai, lơ 6/4, Khua mua hơmâo jơnum ruah mơnuih ngă bruă amăng kơnuk kơna. Rơđah biă ñu, yang hrơi mơguah, Ƀing khua pơ ala mơnuih ƀon sang dêh čar amra brơi pơdơi bruă Kơ-iăng khua mir sir, sa, dua čô ding kơna Jơnum min apăn bruă pơ ala mơnuih ƀon sang, Khua sa, dua Jơnum min mơng Ƀirô khua pơ ala mơnuih ƀon sang dêh čar, Khua čih pioh Ƀirô khua pơ ala mơnuih ƀon sang dêh čar, Khua jŭ yap prăk kăk Kơnuk kơna. Tơdơi kơ anun, Khua mir sir amra pơdah pơƀuh hră tơbiă anăn ba ruah kiăng Khua mua pơ ala mơnuih ƀon sang dêh čar ruah Kơ-iăng khua mir sir; Jơnum min apăn bruă pơ ala mơnuih ƀon sang dêh čar pơƀuh hră tơbiă anăn ba ruah ngă ding kơna Jơnum min apăn bruă pơ ala mơnuih ƀon sang dêh čar. Ƀing khua pơ ala mơnuih ƀon sang amra bơkơtuai amăng grup kơ bruă ruah Kơ-iăng khua mir sir, ding kơna Jơnum min apăn bruă pơ ala mơnuih ƀon sang dêh čar, laih dong čơtlam lĕ amra ruah hơdôm čô mơnuih tơbiă anăn anai hăng bruă plĕ hră hơgŏm. Ăt tlam hrơi anai mơn, Jơnum min apăn bruă pơ ala mơnuih ƀon sang dêh čar pơƀuh hră mơnuih tơbiă anăn ba ruah kiăng Khua mua pơ ala mơnuih ƀon sang dêh čar ruah Khua sa, dua Jơnum min mơng Ƀirô khua pơ ala mơnuih ƀon sang dêh čar, Khua čih pioh Ƀirô khua pơ ala mơnuih ƀon sang dêh čar, Khua jŭ yap prăk kăk Kơnuk kơna.

Siu H’Mai: Pơblang