VOV4.Jarai - Lơ 29/9, Khua mua pơ ala mơnuih ƀon sang tơring čar Daklak pơphun bưp mơnuih ƀon sang hlâo kơ jơnum lok 2, Khua pơ ala mơnuih ƀon sang dêh čar  tal XV. Hơmâo lu tơlơi pơgôp hiăp kơ hơdră bruă kiăng ngă tui hơnong pơkă ha amăng plĕ pơđĭ kyar bơwih ƀong huă rah, pơgang klin rah hơmâo mơnuih ƀon sang rơkâo đĭ. Amăng mông bưp, mơnuih ƀon sang tơring čar Daklak rơkâo Khua pơ ala mơnuih ƀon sang dêh čar, Kơnuk kơna, djop ding jum, gơnong bruă hăng tơring čar tŏ tui git gai khut khăt amăng bruă pơgang klin Covid-19, hơmâo dong vaccine tlâ̆o brơi mơnuih ƀon sang, ngă klă dong amăng bruă ia jrao, wŏt mơnuih mă bruă, gơnam măi mok, biă mă ñu lĕ ƀing nai ia jrao ƀơi djop sang ia jrao kiăng kơ tañ pơgang hĭ klin, ba lŏn ia ta pơwŏt glăi hơdip tui hơđăp.

Ƀing Khua pơ ala mơnuih ƀon sang Daklak bưp ană plơi pla lok 2

Hrŏm hăng anun, mơnuih ƀon sang ăt rơkâo: kiăng čih pơkra, pơhrua sa, dua črăn tơlơi phiăn anun lĕ: Tơlơi phiăn lŏn mơnai, tơlơi phiăn phat kơđi tơlơi thun 2015, tơlơi phiăn iâu ngă tơhan, tơlơi phiăn pơpŭ bơni … kiăng kơ djop gưl, djop gơnong bruă amuñ pok pơhai ngă tui pơplôm khut khăt kiăng pơgăn hĭ bruă ngă soh tơlơi phiăn hăng lăp djơ̆ hăng tơlơi sit nik amăng tơlơi hơdip.

Siu Đoan: Pơblang