VOV4.Jarai-Rơbêh 10 thun ngă khua plơi, ơi A Bưn djuai ania Bahnar plơi Kon Tum Kơpơ̆ng, phường Thắng Lơị, plơi prong Kon Tum, tơring čar Kon Tum ăt hur har mă bruă jak iâu mơnuih ƀôn sang akŏ pơdong tơlơi hơdip mơda gru grua hiam amăng plơi pla, djru hrom gum pơgôp djuai ania amăng plơi pla. Ñu ăt jing mơnuih ba gru hlâo mă bruă hmua, bơwih ƀong huă pơdrong, ngă bruă rơgơi.

Khua plơi ơi A Bưn pơmin kơnong gir run đôč, abih pran jua mă bruă bơwih ƀong hnun kah pơđĭ kyar. Kiăng dưi ngă tui anun, drơi jăn ñu pô khom gir run ƀu pơdơi ôh hrăm tui arăng, khom thâo pơkrem pơkom lui prăk kăk, biă mă ñu bơblih tơlơi pơmin, hơdră mă bruă ngă hmua, pla lu djuai pơjeh phun pla djơ̆ găl tui hluai hăng rĭm bơyan.

A Bưn ƀơi mông jơnum lăi pơthâo bruă mă bơeih ƀong huă rơgơi

Thun 2019, lơ̆m rơnoh sĭ mơdrô rơya pơmă ƀiă, ñu bơblih mơtam 6 ar (sao) đang hơbơi plum ñu, pioh pla rơya soh. Tơdơi kơ 8 blan, jik rơ̆k, buč pơhrui sang anŏ ñu sĭ hơmâo 200 klăk prăk lơ̆m sĭ rơya dŏ asăt. Hrơi blan dŏ tơguan pĕ kơphê 5 hektar, 3 hektar phun bơ̆r aka prong, ñu pla dơ̆ng hơbơi plum, pla pơtơi laih anun ngă hmua pơdai kiăng pơhrui glăi na nao, hơđong.

Mơ̆ng rơnoh prăk pơkom lui ƀiă blung a, sang anŏ blơi rơdêh prong ôtô pioh pơgiăng gơnam arăng, pơgiăng hơbơi ƀlang ană plơi pla. Laih pơhlưh abih rơnoh prăk tuh pơ alin kơ bruă ngă hmua, sang anŏ gơñu hơmâo kơmlai dơ̆ng 250 klăk truh kơ 300 klăk prăk. Ơi A Bưn lăi: Khom nao hlâo soh djop bruă, dơ̆ng mơ̆ng bruă ngă hmua, truh bruă djru nao rai tơdruă. Kâo ăt jak iâu adơi ayong amăng plơi, kâo pô nao hlâo, adơi ayong kiăo tui pioh pơgang tơlơi gum pơgôp tơdruă, lir hơbit djru nao rai kiăng lui rơmŏn kŏn rin”.

Lăng tui gru nao hlâo mơ̆ng khua plơi ơi A Bưn bơwih ƀong huă rơgơi, bruă pơkơtưn nao rai mă bruă ngă hmua pla pơjing ƀơi plơi Kon Tum Kơpơ̆ng jai hrơi pok pơhư lu tui. Plơi hơmâo 365 boh sang hăng 1.500 čô mơnuih ƀôn sang, năng ai 80% mrô sang anŏ mơnuih djuai ƀiă. Tơlơi gir run mă bruă pơđĭ kyar bơwih ƀong huă, djru nao rai amăng tơlơi hơdip mơda truh ră anai pơkă lơ̆m sa čô mă bruă sa thun pơhrui glăi rơbêh 27 klăk prăk. Tơlơi bơwih ƀong huă ƀrư̆ hơđong, mơnuih ƀôn sang jai kraih thâo gum pơgôp, djru pran jua akŏ pơdong tơlơi hơdip mơda phrâo.

Ơi Nguyễn Văn Hùng, Khua Jơnum min mơnuih ƀôn sang phường Thắng Lợi, plơi prong Kon Tum, tơring čar Kon Tum brơi thâo dơ̆ng : A Bưn lĕ khua plơi Kon Tum Kơpơ̆ng rơbêh 10 thun laih. Thun hlâo, mơnuih ƀôn sang ăt đăo kơnang kơ ñu, ruah ñu dơ̆ng mơ̆n ngă khua plơi mơ̆ng thun 2020-2022.

Amăng hơdôm thun mă bruă, A Bưn hur har biă mă, boh nik ñu amăng bruă pơtô lăi mơnuih ƀôn sang, jak iâu ngă tui pơdong plơi pla phrâo amăng plơi prong, djru hrom pơkra jơlan nao rai tuh hăng simăng ƀêtông. A Bưn ăt jing sa amăng hơdôm mơnuih ba gru hlâo lăp pioh kơ mơnuih ƀôn sang hla tui”.

Triăng mă bruă, hur har djop tơlơi laih anun hmar amăng bruă ngă hmua pla pơjing, djru mơnuih ƀôn sang amăng plơi, Khua plơi A Bưn ƀơi plơi prong Kon Tum, hơmâo pơdong sang prong, hiam kơdrưh biă mă, tơlơi hơdip mơda sang anŏ ñu trơi pơđao yâo mơak, ană bă thâo rơnôm. Tơlơi pơmin bơblih phrâo hiam klă hăng thâo djru ba ană plơi pla, Khua plơi A Bưn lăp jing gru bơngač amăng bruă pơkơtưn mă bruă khăp kơ lŏn ia pioh mơnuih ƀôn sang hrăm hăng hla tui.

 Nay Jek: Pơblang