VOV4.Jarai - Tô̆ tui jơlan hơdră tal jơnum lok 11, mơguah lơ 2/4, Khua pơ ala mơnuih ƀôn sang dêh čar ta hmâo pơsit pel ĕp Tơlơi pơtrun pơsit kơ bruă brơi pơdơi apăn bruă Khua dêh čar hăng ơi Nguyễn Xuân Phúc. Tơlơi pơtrun pơsit dưi hmâo Khua pơ ala mơnuih ƀôn sang dêh čar ta tŭ ư. Pơ ala kơ Khua pơ ala mơnuih ƀôn sang dêh čar ta Khua git gai wai lăng pơ ala mơnuih ƀôn sang dêh čar ta ơi Vương Đình Huệ bơni hăng ƀơk bơnga kơ ơi Nguyễn Xuân Phúc. Hlâo kơ anun, Khua git gai Ping gah, Khua mir sir dêh čar ta ơi Nguyễn Phú Trọng hmâo lăi pơdah laih hră pơ-ar ƀơi anăp Khua pơ ala mơnuih ƀôn sang dêh čar ta. Hră pơ-ar anun lăi rơđah, amăng tal jơnum lok sa Khua pơ ala mơnuih ƀôn sang dêh čar ta tal 14, ơi Nguyễn Xuân Phúc dưi hmâo Khua pơ ala mơnuih ƀôn sang dêh čar ta đăo gơnang ruah ngă Khua dêh čar. Amăng hơdôm thun ngă Khua dêh čar ơi Nguyễn Xuân Phúc ngă giong klă laih bruă jao. Amra dưi ƀuh rơwang bruă 2016-2021 lĕ sa rơwang bruă yôm phăn, Kơnuk kơna hmâo git gai laih bruă lŏn ia Việt Nam găn gao hơdôm glông jơlan tơnap tap ba glăi hơdôm bôh than klă hiam. Ăt amăng mơguah lơ 2/4 mơn, Jơnum min apăn bruă Khua pơ ala mơnuih ƀôn sang dêh čar ta lăi pơthâo kơ Khua pơ ala mơnuih ƀôn sang dêh čar ta brơi pơdơi apăn bruă Khua mir sir; ƀing khua pơ ala pơphun plĕ hră hơgom hăng hmư̆ Jơnum min apăn bruă Khua pơ ala mơnuih ƀôn sang dêh čar ta lăi pơthâo hră čih anăn mơnuih tơbiă anăn pioh Khua pơ ala mơnuih ƀôn sang dêh čar ta ruah Khua mir sir dêh čar./.

Siu H’ Prăk: Pô pơblang