VOV4.Jarai - Tlam tom brơi (2/4), lơ̆m hơmâo lu khua mua tŭ ư, Khua pơ ala mơnuih ƀon sang dêh čar hơmâo pơsit kơ bruă brơi pơdơi bruă Khua mir sir dêh čar Việt Nam kơ ơi Nguyễn Phú Trọng. Tơlơi pơsit hơmâo Khua pơ ala mơnuih ƀon sang dêh čar pơsit: Brơi pơdơi bruă Khua mir sir dêh čar Việt Nam rơwang thun 2016 - 2021 hăng ơi Nguyễn Phú Trọng. Tơlơi pơsit dưi ngă tui dong mơng mông Khua pơ ala mơnuih ƀon sang dêh čar ruah khua mir sir phrâo. Amăng rơwang thun mă bruă, Khua mir sir Nguyễn Phú Trọng biă mă đing nao bruă git gai, wai lăng bruă pơjing Ping gah, pơjing bruă kơđi čar tơpă sit, hơđong kjăp, laih dong khut khăt, gir run abih pran jua amăng bruă pơgăn hưp ƀong kông ngăn, yua kông ngă khưi khai, ngă soh. Ăt amăng tlam tom brơi mơn, Jơnum min apăn bruă Khua pơ ala mơnuih ƀon sang dêh čar mơ-it đĭ hră čih anăn khua mua amra ruah ngă khua mir sir dêh čar. Kiăo tui anun, ƀing khua mua pơčrông sai ƀơi grup kơ bruă ruah khua mir sir dêh čar ta.

Siu Đoan: Pơblang