VOV4.Jarai - Tlam lơ 13/4, Khua pơ ala mơnuih ƀon sang dêh čar ơi Vương Đình Huệ, Khua khul plĕ hră ruah khua dêh čar hăng grup hyu pel ĕp mơng Khul apăn  bruă Ping gah Khua pơ ala mơnuih ƀon sang dêh čar,  Khul pơphun plĕ hră ruah khua dêh čar mă bruă hăng Khul apăn bruă Ping gah, Jơnum min plĕ hră ruah khua bôn prong Hải Phòng.

Đĭ pơhiăp amăng mông mă bruă, Khua pơ ala mơnuih ƀon sang dêh čar ơi Vương Đình Huệ, Khua khul plĕ hră ruah khua dêh čar brơi thâo, Hải Phòng lĕ tơring čar blung a arăng pel ĕp mơng khua mua phrâo, yua anai lĕ sa amăng hơdôm tơring čar ngă klă amăng bruă plĕ hră mơng anun amra pơčrông sai, pơlăi nao rai tơlơi thâo kiăng lăng glăi hrŏm amăng đơ đam dêh čar.

Khua pơ ala mơnuih ƀon sang dêh čar ơi Vương Đình Huệ rơkâo, pơ anăp anai, ƀôn prong Hải Phòng amra tŏ tui ngă tui djơ̆ hơnong pơkă, tơlơi rơkâo mơng tal plĕ hră anai; sem lăng tong ten amăng bruă ruah khua mua djop gưl hăng pơpha bruă lăp djơ̆ brơi rĭm čô mơnuih tơdơi kơ ruah đĭ. Khul pơphun plĕ hruă kiăng hơmâo mrô telephôn iâu ječ kiăng pơsir hĭ hơdôm tơlơi ngă tơnap tap kiăng kơ git gai pơsir hmao tlôn amăng tal plĕ hră anai.

Siu Đoan: Pơblang