VOV4.Jarai - Tô̆ tui jơlan hơdră tal jơnum lok 11, hrơi anai (5/4) Khua pơ ala mơnuih ƀôn sang dêh čar ta pơphun glông bruă ruah Khua mir sir dêh čar, Khua dêh čar hăng hơdră plĕ hră hơgom. Tơdơi kơ dưi ruah, Khua mir sir phrâo, Khua dêh čar phrâo amra đĭ apăn bruă. Khua git gai wai lăng pơ ala mơnuih ƀôn sang dêh čar ta ơi Vương Đình Huệ hmâo lăi pơthâo kơ Khua pơ ala mơnuih ƀôn sang ruah ơi Nguyễn Xuân Phúc pioh Khua pơ ala mơnuih ƀôn sang dêh čar ta ruah ngă Khua mir sir dêh čar. Amăng hrơi anai, Khua mir sir dêh čar lăi pơthâo hră čih anăn mơnuih tơbiă anăn kơ Khua pơ ala mơnuih ƀôn sang ruah Khua dêh čar, bơkơtuai ƀơi Grŭp kơ pơkă lăng hlâo mơnuih mă bruă pioh ruah Khua dêh čar. Čơtlăm, Khua pơ ala mơnuih ƀôn sang dêh čar ta hăng hơdră plĕ hră hơgom; pơsit pel ĕp Tơlơi pơtrun pơsit ruah Khua dêh čar. Kiăo tui anun Khua dêh čar đĭ apăn bruă ƀơi anăp Khua pơ ala mơnuih ƀôn sang dêh čar ta. Ăt amăng rơwang hrơi tơjuh mă bruă rơnuč mơng tal jơnum lok 11, Khua pơ ala mơnuih ƀôn sang dêh čar ta amra ngă tui tơlơi brơi pơdơi bruă hăng pơphun glông bruă ruah Kơ-iăng Khua mir sir, sa dua ding kơna Jơnum min apăn bruă Khua pơ ala mơnuih ƀôn sang dêh čar ta; khua sa dua jơnum min mơng Khua pơ ala mơnuih ƀôn sang dêh čar ta, Khua čih pioh Khua pơ ala mơnuih ƀôn sang dêh čar ta, Khua wai lăng bruă mă yua prăk Kơnuk kơna hăng hơdră plĕ hră hơgom./.

Siu H’ Prăk: Pô pơblang