VOV4.Jarai - Tô̆ tui jơlan hơdră mă bruă mơng tal Jơnum lok 11, hrơi anai (31/3), Khua pơ ala mơnuih ƀôn sang dêh čar ta mă bruă ƀơi sang rông hăng pioh abih bang mông kơ bruă ruah mơnuih mă bruă, ngă giong bruă ruah khua git gai mơng Khua pơ ala mơnuih ƀôn sang.

Hăng bruă apăn Khua git gai wai lăng pơ ala mơnuih ƀôn sang dêh čar, ơi Vương Đình Huệ - Ding kơna Ding jum kơđi čar, Khua git gai Ping gah ƀôn prong Hà Nội, Khua git gai Ƀirô pơtrun bruă tơhan plơi prong jưh jom, Khua Grŭp khua pơ ala mơnuih ƀôn sang ƀôn prong Hà Nội lĕ mơnuih dưi lăi pơthâo kiăng Khua pơ ala mơnuih ƀôn sang ruah ngă khua pơ ala kơ yă Nguyễn Thị Kim Ngân dưi hmâo Khua pơ ala mơnuih ƀôn sang dêh čar ta brơi pơdơi bruă. Amăng mông mă bruă mơguah, Jơnum min apăn bruă Khua pơ ala mơnuih ƀôn sang dêh čar lăi pơthâo glăi bôh tơhnal bruă bơkơtuai amăng Grŭp hăng lăi pơblang, tŭ mă tơlơi gum pơhiăp mơng Khua pơ ala mơnuih ƀôn sang kơ pơkă hlâo mơnuih apăn bruă, mơnuih mă bruă kiăng ruah ngă Khua git gai wai lăng pơ ala mơnuih ƀôn sang dêh čar, Khua Jơnum min ruah khua lŏn ia. Kiăo tui anun, Khua pơ ala mơnuih ƀôn sang bơkơtuai, pơsit pel ĕp hră čih anăn hăng ruah Khua git gai mơng Khua pơ ala mơnuih ƀôn sang, Khua Jơnum min ruah khua lŏn ia hăng hơdră plĕ hră hơgom. Ăt amăng mông mă bruă hrơi anai mơn, Jơnum min apăn bruă Khua pơ ala mơnuih ƀôn sang lăi pơthâo kơ Khua pơ ala mơnuih ƀôn sang brơi pơdơi bruă sa dua čô Kơ-iăng Khua git gai wai lăng pơ ala mơnuih ƀôn sang dêh čar hrom hăng anun lăi pơthâo hră čih anăn pioh lăi pơthâo mơnuih pơ ala nao./.

Siu H’ Prăk: Pô pơblang