VOV4.Jarai-Lơ 13/5, Khul pơphun ruah khua dêh čar pơphun ĕp lăng bruă prăp lui ruah khua ƀơi lu tơring čar amăng dêh čar, kiăng pơhlôm hlâo kơ hrơi ruah khua jing hrơi mơak kơ abih bang mơnuih ƀôn sang, pơphun rơnuk rơnua hơđong, hiam klă. Grup krăo lăng, sem hlâo mơ̆ng Jơnum min apăn bruă git gai phun pơ ala mơnuih ƀôn sang dêh čar, Khul ruah khua dêh čar yua kơ Kơ-iăng Khua mir sir, Kơ-iăng khua pơphun bruă ruah khua dêh čar, yă Võ Thị Ánh Xuân ngă khua grup, hơmâo nao mă bruă hăng tơring čar Dak Nông.

Hrom hăng anun mơ̆n, Grup nao ĕp lăng, sem hlâo mơ̆ng Jơnum min apăn bruă git gai phun pơ ala mơnuih ƀôn sang dêh čar, Khul pơphun ruah khua dêh čar, yua kơ Thượng tướng, ơi Nguyễn Văn Được, Khua Khul tơhan hơđăp Việt Nam, ding kơna Khul pơphun bruă ruah khua dêh čar nao mă bruă hăng Jơnum min ruah khua tơring čar Dak Lak kơ bruă ruah khua.

Ơi Nguyễn Văn Được, Khua Khul tơhan hơđăp Việt Nam, ding kơna Jơnum min ruah khua dêh čar đĭ pơhiăp amăng mông mă bruă

Thượng tướng ơi Nguyễn Văn Được lăng yom boh tơhnal mơ̆ Jơnum min ruah khua tơring čar Dak Lak dưi ngă laih. Laih dơ̆ng, rơkâo tơring  čar Dak Lak ăt pơtô lăi djop, hơdôm mơta hră pơar, tơlơi phiăn pơtrun mơ̆ng Gơnong dlông, tơring čar, tơring glông truh pơ să thâo soh bruă ruah khua.

Gleng nao kơ bruă pơgang rơnuk rơnua hơđong, pơgăn mơtam tơlơi soh sat phă pơrai bruă ruah khua; khom thâo hlâo tơlơi pơhing, pơgăn tơlơi pơmin sat mơ̆ng ƀing hơmâo grup, khul ngă soh kiăng pơgang anih ruah khua hơđong. Djop gưl anom bruă ngă hrom kjăp pơpha bruă mă, tơlơi gơgrong amăng bruă mă; pơhlôm hơđong mơnuih ƀôn sang ngă khua pô ruah khua, djơ̆ tơlơi phiăn hăng pơhlôm pơgang klin kheng.

Nay Jek: Pơblang