VOV4.Jarai - Lơ 14/4, Grŭp hyu mă bruă mơng Khul ruah khua lŏn ia yua kơ Thượng tướng Võ Trọng Việt – Khua Jơnum min pơgang lŏn ia rơnuk rơnua plơi pla ngă khua grŭp hmâo mông pel ĕp, lăng tui bruă pơhlôm rơnuk rơnua hơđong hăng bruă ia jrao prăp lui ruah khua pơ ala mơnuih ƀôn sang dêh čar hăng Jơnum min pơ ala mơnuih ƀôn sang hơdôm gưl rơwang bruă 2021-2026 ƀơi tơring čar Gialai. Tui hăng Jơnum min ruah khua tơring čar Gialai, tơring čar hmâo pơdŏng laih 3 bôh anom ruah khua tui anun hăng 3 grŭp ruah khua pơ ala mơnuih ƀôn sang hăng hơdôm anom ruah khua, hơdôm grŭp ruah khua Jơnum min pơ ala mơnuih ƀôn sang hơdôm gưl; pơdŏng 1438 grŭp ruah khua ƀơi hơdôm bôh anom plĕ hră amăng đơ đam tơring čar. Hrom hăng anun, tơring čar ăt hmâo pơphun laih 2 bruă jơnum bơkơtuai, ngă giong hơdôm bruă jơnum mă tơlơi gum pơhiăp mơnuih ƀôn sang ƀơi anih dô̆. Jơnum bơkơtuai tal 3 pơkă hlâo amra dưi pơphun amăng lơ 17/4 pơ̆ anăp anai. Gah tơlơi rơnuk rơnua, hơđong, Gialai hmâo laih grŭp gơgrong bruă, hrưn đĭ ba glăi bôh tơhnal hăng hơdôm tơlơi pơčeh ča, pơsuh; gah lui hơdôm tơlơi pơhing lăi săt, răm, tơlơi pơmin ƀu djơ̆, pơareh nao rai bơdjơ̆ nao mơnuih tơbiă anăn. Hrom hăng anun, tơring čar ăt glăk djă pioh mơn bruă mă mơng 24 grŭp dô̆ gak hơđong hăng 10 grŭp hyu pơgang, pơgăn klin Covid-19 ƀơi kual guai lŏn ia giăm hăng dêh čar Kur... Amăng mông mă bruă, Thượng tướng Võ Trọng Việt – Khua Jơnum min pơgang rơnuk rơnua plơi pla lŏn ia mơng Khul ruah khua lŏn ia pơsit yôm bruă pơhlôm rơnuk rơnua hơđong hăng bruă ia jrao kơ bruă ruah khua mơng tơring čar Gialai, hrom hăng anun đăo gơnang bruă pơphun ruah khua amra truh kih klă hiam./.           

Siu H’ Prăk: Pô pơblang