VOV4.Jarai - Tlâo blan akô̆ thun 2021, prăk pơhrui glăi mơng gơnam sĭ kơ dêh čar tač rơngiao mơng Daklak kơnong kơ hmâo 95 klăk dolar Mi, dưm dưm hăng 14,6% kơčăo bruă sa thun hăng hrŏ trun rơbêh kơ 20% bơhmu hăng thun hlâo. Sa amăng hơdôm bôh than ngă gơnam sĭ kơ dêh čar tač rơngiao mơng Daklak hrŏ trun lu lĕ yua bơbeč mơng klin ruă Covid-19 ƀơi rŏng lŏn tơnah, hơdôm anom wai lăng ƀat tô kơƀah container hong pioh jao kơ mơnuih sĭ gơnam dŭ pơgiăng gơnam.

Hăng sa amăng hơdôm bôh anom bơwih ƀong glăk bŏng glăi hăng tơlơi tơnap yua kơ ƀu dưi sĭ gơnam kơ dêh čar tač rơngiao, ơi Nguyễn Xuân Lợi, Khua Sang bruă tuh pơplai hăng pơđĭ kyar An Thái brơi thâo: Ră anai, lu hră čih anăn truh hrơi jao kơ bơnah blơi samơ̆ dô̆ tơguan truh hrơi dưi hmâo ƀat tô dưm dăp gơnam tam. Kơƀah container ăt ngă nua apah pơgiăng gơnang đĭ tui mơn, dua lĕ mông rô nao rai đĭ lu biă: nua hơdôm tal pơgiăng nao pơ̆ Mi, nao pơ̆ kual Mi Kô̆ đĭ lu truh 3 wot bơhmu hăng hlâo, prăk apah pơgiăng nao pơ̆ hơdôm bôh dêh čar gah kual Đông Nam Á ăt đĭ mơng 25-40% mơn.

 “Lom kơƀah container hong lĕ bruă pơgiăng gơnam tơnap hloh amra ba truh hơdôm tơlơi phrâo hmâo. Sa lĕ hrơi djă pioh gơnam đĭ tui, dua lĕ hrơi djă pioh ƀat tô sui hloh, hrơi apah pran mă bruă sui hloh, ba truh prăk mă yua pơgiăng đĭ lu. Yua anun thun anai Anom bơwih ƀong sit ñu hmâo kơmlai amra hrŏ trun lu hăng amra lup lu dong”.

Mơnuih mă bruă kơ Sang bruă bơwih ƀong mơnuih ƀôn sang sa ding kơna blơi sĭ gơnam hăng dêh čar tač rơngiao 2/9 Daklak anung gơnam răk pioh amăng khô ngă rơ-ơ̆ hlâo kơ ba nao sĭ kơ dêh čar tač rơngiao

Ăt kah hăng tơlơi anai mơn, ơi Lê Đức Huy, Kơ-iăng Khua Sang bruă bơwih ƀong mơnuih ƀôn sang sa ding kơna blơi sĭ gơnam hăng dêh čar tač rơngiao 2/9 Daklak brơi thâo, 3 blan akô̆ thun anai, 2 mơta gơnam sĭ kơ dêh čar tač rơngiao ba jơlan hlâo mơng Sang bruă lĕ tiu hăng kơphê leng kơ hrŏ trun lu, hrŏ trun truh 60% bơhmu hăng thun hlâo. Anom bơwih ƀong khom hơngah lui hră rơkâo blơi mơng bơnah gum hrom kual Mi Kô̆ yua kơ ƀu dưi ĕp ƀuh tal pơgiăng gơnam nao. Đa lĕ hơdôm hră pơkôl hmâo kĭ sui hăng anai hai ăt dô̆ gah rơngiao tơdrun tum păn mơn.

 “Dong mơng rơnuč thun 2020 akô̆ thun 2021 hăng truh kơ ră anai lĕ mrô container hong ƀu hmâo dong tah ƀơi hơdôm bôh dêh čar kual ASIA anun ba truh prăk apah pơgiang mơng ASIA nao pơ̆ dêh čar Mi ƀudah kual Mi Kô̆ đĭ ƀiă biă mă mơng 4 truh kơ 6 wot. Gơnam hmâo hơđăp, mơnuih blơi ăt kiăng gơnam mơn, samơ̆ lom pel ĕp prăk apah dua bơnah leng kơ tŭ ư pơgiăng kaih ƀiă, ƀu djơ̆ lom anai ôh yua kơ ñu lup lu đơi, ƀu dưi ôh, hmâo hơdôm hră rơkâo blơi hlâo Delay mơng 3 blan akô̆ thun truh 3 blan tal 3”.

Ơi Huỳnh Ngọc Dương, Kơ-iăng Khua Gơnong bruă sĭ mơdrô tơring čar Daklak brơi thâo, tơring čar anai, ră anai hmâo 21 bôh anom bơwih ƀong sĭ gơnam kơ dêh čar tač rơngiao. Amăng 3 blan akô̆ thun anai, prăk pơhrui glăi mơng gơnam sĭ kơ dêh čar tač rơngiao mơng tơring čar kơnong kơ hmâo 95 klăk dolar Mi, dưm dưm hăng 14,6% kơčăo bruă sa thun hăng hrŏ trun rơbêh kơ 20% bơhmu hăng thun 2020. Yua kơ jơlan ba gơnam nao sĭ tơnap tap, kiăng djru anom bơwih ƀong, Gơnong bruă sĭ mơdrô tơring čar Daklak glăk pơtrut kơtang hơdôm bruă tô nao rai, pok prong anih anom sĭ gơnam, đing nao mă yua bôh thâo phrâo măi mok sĭ mdrô điện tử kơ anom bơwih ƀong. Hrom hăng anun, mă bruă hăng Anom sĭ blơi gơnam hăng dêh čar tač rơngiao (Ding jum sĭ mơdrô dêh čar) pơphun jơlan hơdră pơtrut sĭ mơdrô kiăng hơdôm anom bơwih ƀong sĭ gơnam kơ dêh čar tač rơngiao mơng tơring čar dưi hmâo jơlan gah sĭ mdrô gơnam kơ dêh čar tač rơngiao ăt kah hăng hơdôm akô̆ phun pơphun bruă bơwih ƀong sĭ mơdrô blơi sĭ hăng dêh čar tač rơngiao kiăng gum hrom ĕp jơlan nao djơ̆:

 “Ƀing gơmơi ăt hmâo mă bruă laih hăng abih bang hơdôm Gơnong bruă sĭ mơdrô rôk tui guai lŏn ia gah Pơngŏ hluai tui anun gơñu amra lăi pơhing, tơlơi guai lŏn ia hmao tlôn kiăng gơgrong hlâo hmâo gơnam amăng anai. Mơta pơkon dong lĕ ră anai ƀing gơmơi hmâo lăi pơthâo nao rai sa dua bôh anom bơwih ƀong ƀơi hơdôm anih bah amăng jang dêh čar kiăng gơñu prăp lui djru kơ anom bơwih ƀong Daklak apah anih dưm gơnam, yua tơdăng anih dưm, djru dŭ gơnam tơdah tơlơi ngă gun lom jao gơnam ƀơi bah amăng jang dêh čar truh thơ”./.

            Nam Trang: Pô čih – Siu H’ Prăk: Pô pơblang