VOV4.Jarai - Tlam lơ 9/4, Khua apăn bruă Ping gah - Kơ-iăng khua dêh čar ta ơi Lê Minh Khái hrŏm hăng ƀing Khua pơ ala mơnuih ƀon sang dêh čar lĕ khua mua tơring čar Bạc Liêu hơmâo mông bưp mơnuih ƀon sang ƀơi tơring čar Bạc Liêu tơdơi kơ jơnum lok 11, Khua pơ ala mơnuih ƀon sang dêh čar tal XIV. Ƀing khua mua hơmâo lăi pơthâo brơi mơnuih ƀon sang boh tơhnal mơng jơnum lok 11, Khua pơ ala mơnuih ƀon sang dêh čar tal XIV, rơwang thun 2016-2021. Mơnuih ƀon sang tơring čar Bạc Liêu lăng yôm boh tơhnal mơng jơnum lok 11 hăng bruă mă mơng Khua pơ ala mơnuih ƀon sang tơring čar Bạc Liêu amăng thun blan laih rơgao.

Kơ-iăng khua dêh čar ơi Lê Minh Khái pơhiăp amăng mông bưp

Mơnuih ƀon sang ăt rơkâo sa, dua bruă hăng ƀing khua mua anun lĕ: Ră anai, khua git gai Ping gah ngă rah khua plơi glăk mă bruă tơnap tap yua kơ lu bruă đơi, prăk apah brơi khua mua ƀơi ƀon lan ră anai dŏ aset kiăng kơ sem lăng đĭ tui dong. Đĭ pơhiăp amăng mông bưp, Kơ-iăng khua dêh čar ta ơi Lê Minh Khái pơdah pran pơpŭ bơni hăng ƀing khua mua Ping gah tơring čar, Khua khul pơ ala mơnuih ƀon sang, Jơnum min mơnuih ƀon sang tơring čar , djop gơnong bruă hăng mơnuih ƀon sang tơring čar Bạc Liêu hơmâo đăo gơnang djru brơi ƀing khua pơ ala mơnuih ƀon sang tơring čar pơgiong bruă jao amăng rơwang bruă tal XIV hăng ngă rơđah sa, dua tơlơi rơkâo mơng mơnuih ƀon sang.

Siu Đoan: Pơblang