VOV4.Jarai - Ƀrô djơ̆ tal hơdor glăi Hrơi gru grua bruă Ping gah pơ̆ dêh čar tač rơngiao (31/3), mơguah tom brơi (30/3), Khua ding jum pơtom hiăp pơphun bưp ƀô̆ mơta tui phiăn juăt “60 thun – Sa črăn jơlan ư-ang bruă ping gah pơ̆ dêh čar tač rơngiao” hăng bơkơtuai “Pơđĭ tui bôh tơhnal bruă Ping gah pơ̆ dêh čar tăč rơngiao amăng rơnuk anai”. Kơ-iăng Khua dêh čar, Khua Ding jum pơtom hiăp dêh čar ta ơi Phạm Bình Minh nao pơhmư̆ hăng đĭ pơhiăp črâo ba.

Amăng mông bơkơtuai, Kơ-iăng Khua dêh čar ta ơi Phạm Bình Minh rơkâo hơdôm gưl ping gah amăng lŏn ia hăng pơ̆ dêh čar tăč rơngiao khom pơđĭ tui hloh dong bruă gơgrong, tơlơi gơgrong hlâo pơčeh phrâo, pran jua gơgrong pô, pơhrăm pô mơng mơnuih apăn bruă, mơnuih ping gah ƀơi anăp djop bruă, pơdŏng mơnuih apăn bruă ping gah pơ̆ tăč rơngiao jai kơjăp tui; bruă pơdŏng ping gah khom kơjăp hăng git gai ngă tui bruă kơđi čar, hrom hăng anun kơtưn bruă mă, ngă tui đut hlah tơlơi gum hrom, gum hrom mơng hơdôm gưl, hơdôm gơnong bruă, plơi pla pioh kơ bruă ping gah pơ̆ tăč rơngiao./.

Siu H’ Prăk: Pô pơblang