Kơ-iăng Khua dêh čar ơi Trương Hòa Bình hrom hăng grup mă bruă mơ̆ng Kơnuk kơna phrâo nao ĕp lăng bruă mă pơhlôm, pơgang klin Covid 19 ƀơi tơring čar Đồng Tháp. Pơhiăp ƀơi mông jơnum, Kơ-iăng Khua dêh čar ơi Trương Hòa Bình pơtă pơtăn kơ tơring čar Đồng Tháp, hơmâo jơlan guai dêh čar hăng Kur, kơđiăng pơgăn ƀing arăng mut rai ča čot amăng dêh čar, hŭi ba rai kman duăm ruă djơ̆ klin prong.

Kơ-iăng Khua dêh čar pơtrun hiăp kơ tơring čar Đồng Tháp khom pơtum tong ten bruă ngă tui tơlơi pơtrun mơ̆ng Khua dêh čar, ngă tui hơdră 5 K+ vaccine, pơtô pơblang kơ mơnuih ƀôn sang thâo hluh, pơsir khut khăt ƀing ngă soh pơhlôm pơgang klin, mut tơbiă ča čot ƀơi guai dêh čar. Anăm ngă mưng, tơdu ôh, kah hăng ƀu kơđiăng amăng bruă pơhlôm pơgang klin, brơi pok pơhai klă bruă mă pơhlôm, pơgang klin, biă mă ñu amăng lơ 30/4 hăng lơ 1/5 ăt kah hăng bruă či prăp lui ruah khua pơ anăp anai.

Nay Jek: Pơblang