VOV4.Jarai - Mơguah lơ 30/3, ƀơi Ƀirô Khua mir sir, pơ ala brơi Khua git gai Ping gah, Khua mir sir dêh čar ta ơi Nguyễn Phú Trọng, kơ-iăng khua mir sir dêh čar ta yă Đặng Thị Ngọc Thịnh hơmâo jao tơlơi pơsit mơng Khua mir sir dêh čar ta ruah ơi Lê Khánh Hải, Ding kơna Khul apăn bruă Ping gah dêh čar, Kơ-iăng khua anom bruă khua mir sir dêh čar đĭ ngă Khua anom bruă khua mir sir.

Pơ ala brơi khua mua Ping gah, Kơnuk kơna jao tơlơi pơsit ruah ơi Lê Khánh Hải, Kơ-iăng khua mir sir dêh čar ta yă Đặng Thị Ngọc Thịnh lăi, lĕ sa čô mơnuih apăn bruă thâo rơgơi amăng bruă git gai, wai lăng; hơmâo ngă truh kih lu bruă jao yôm phun amăng Ding jum gru grua, bơrơguăt drơi jăn hăng tuai čuă ngui.

 Ơi Lê Khánh Hải hrŏm hăng djop gơnong bruă hơmâo pok pơhai ngă truh kih lu bruă yôm phun, ječ ameč, amăng pơjing bruă gru grua, bơrơguăt drơi jăn hăng tuai čuă ngui. Đĭ pơhiăp amăng mông tŭ mă tơlơi pơsit, Khua anom bruă khua mir sir dêh čar ơi Lê Khánh Hải pơsit tong amra abih pran jua amăng bruă mă, gir run dong kiăng kơ ngă pơgiong tui tơlơi rơkâo, bruă jao.

Siu Đoan: Pơblang