VOV4.Jarai - Tom brơi (30/3), ƀơi Ƀirô Kơnuk kơna, Kơ-iăng khua dêh čar, Khua ding jum pơtom hiăp ơi Phạm Bình Minh hơmâo mông bưp bơkơtuai hăng ơi John Kerry, Khua djru bruă mơng Khua mir sir Mi kơ bruă ayuh hyiăng ƀu klă ngă. Dua bơnah tĭ ư lăng tơlơi rô nao rai ngă hrŏm djop mơta bruă kơplah wah Việt Nam - Mi tŏ tui pơđĭ kyar kơtang amăng djop mơta bruă, ba glăi tơlơi dưi sit nik brơi kơ mơnuih ƀon sang dua boh dêh čar.

Kơ-iăng khua dêh car, khua ding jum pơtom hiăp dêh čar ta ơi Phạm Bình Minh hok mơ-ak hăng bruă Kơnuk kơna Khua mir sir ơi Joe Biden kơtưn ngă tui tơlơi ƀuăn hăng pơtrut hrŏm hăng jar kmar kiăng pơgang ayuh hyiăng ƀu klă ngă. Kơ-iăng khua dêh čar ta lăi pơtong, lĕ sa amăng hơdôm boh dêh čar bơbeč nao kơtang yua kơ ayuh hyiăng ƀu klă ngă, hăng hơdră bruă khut khăt hăng gơgrong abih pran jua, Việt Nam hơmâo ngă hăng glăk ngă laih dong amra dong yua hơdôm tơlơi pơkôl amăng jar kmar hăng ngă hrŏm kjăp kơplah wah hơdôm dêh čar kiăng pơsir hĭ tơlơi lông mơng ayuh hyiăng ƀu klă ngă, amăng anun hơmâo kơtưn ngă hrŏm hăng Mi.

Siu Đoan: Pơblang