VOV4.Jarai - Čơtlăm tom brơi (16/4), ơi Nguyễn Khắc Định, Kơ-iăng Khua GGWLPA mơnuih ƀôn sang dêh čar, Khua git gai Ping gah tơring čar, Khua grŭp Khua pơ ala mơnuih ƀôn sang tơring čar Khánh Hòa git gai Jơnum Ping gah tơring čar Khánh Hòa hmư̆ tơlơi lăi pơthâo glăi rơnoh bruă pơplih pơkra Kual pơkă hrom Bơwih ƀong Vân Phong hăng Akô̆ bruă pơkă, hơdră bruă pơđĭ kyar bơwih ƀong anai. Tui hăng tơlơi ba tơbiă mơng hơdôm bôh anom lăi pơthâo, Kual bơwih ƀong Vân Phong hmâo abih bang lŏn prong rơbêh kơ 150 rơbâo ektar, amăng anun, črăn lŏn hăng bul pơtâo ia rơsĭ lĕ ha mơkrah. Anom lăi pơthâo hmâo rơkâo pơhrua nao laih črăn lŏn mơng să Xuân Sơn, tơring glông Vạn Ninh năng ai ñu 3.500 ektar hăng gah ia rơsĭ năng ai ñu 1.500 ektar. Ơi Nguyễn Khắc Định, Kơ-iăng Khua GGWLPA mơnuih ƀôn sang dêh čar, Khua git gai Ping gah tơring čar Khánh Hòa rơkâo, hơdôm gơnong bruă, anom bruă tơring čar Khánh Hòa tañ pơdŏng Grŭp hyu mă bruă gum hrom hăng Grŭp wai lăng Kual bơwih ƀong Vân Phong, pơhrua hrom lŏn pơkă Kual bơwih ƀong Vân Phong amăng lŏn pơkă hrom mơng tơring čar Khánh Hòa./.

Siu H’ Prăk: Pô pơblang