VOV4.Jarai - Tlam lơ 4/5, Đại tướng Đỗ Bá Tỵ, Kơ-iăng khua git gai pơ ala mơnuih ƀon sang dêh čar, ding kơna Khul wai lăng bruă ruah khua dêh čar, Khua anom wai lăng rơnuk rơnua hăng ia jrao hơmâo mông nao hơduah tơña, pel ĕp, ngă bruă hăng Jơnum min ruah khua tơring čar Bình Định. Truh ră anai, Jơnum min ruah khua tơring čar Bình Định hơmâo pơdong 3 anom bruă ruah khua pơ ala mơnuih ƀon sang dêh čar, 19 anom bruă ruah khua jơnum min pơ ala mơnuih ƀon sang tơring čar, 110 anom bruă ruah khua jơnum min pơ ala mơnuih ƀon sang tơring glông, plơi prong hăng giăm 1.200 anom bruă ruah khua pơ ala mơnuih ƀon sang să, phường. ră anai, tơring čar Bình Định aka ƀu hơmâo pô ƀă klin lơi, samơ̆ anom bruă ia jrao hơmâo prăp lui laih hơdră pơgang klin Covid-19; hơmâo lu hơdră wai lăng hơđong kơjăp plơi pla. Pơhiăp ƀơi mông ngă bruă, Kơ-iăng khua git gai pơ ala mơnuih ƀon sang dêh čar ơi Đỗ Bá Tỵ lăi rơđah, mơng hrơi anai truh hrơi plĕ hră, Jơnum min ruah khua tơring čar Bình Định kiăng pơtrut hloh dong bruă pôr pơhing. Anom bruă ia jrao hơmâo hơdră prăp lui hlâo pơgang klin Covid-19 hơđuh đĭ ƀơi tơring čar, pơhlôm brơi mông plĕ hră ruah pơphun truh kih, klă hiam, huăi rơngiă prăk kăk lu.

Siu H’Mai: Pơblang