VOV4.Jarai - Mơguah lơ 14/5, Grup hyu hơduah ĕp mơng Khul pơphun plĕ hră ruah khua dêh čar ta yua Ding kơna Ping gah dêh čar, Kơ-iăng khua mir sir, Kơ-iăng Khua Khul pơphun plĕ hră ruah khua dêh čar yă Võ Thị Ánh Xuân ba jơlan hlâo, hơmâo mông pel ĕp kơ bruă pral lui hrơi plĕ hră ƀơi tơring čar Lâm Đồng. Truh ră anai, bruă prap lui hrơi plĕ hră ƀơi tơring čar Lâm Đồng hơmâo pơphun djơ̆ hăng tơlơi pơkă hăng djơ̆ hrơi mông.

Kơ-iăng khua mir sir dêh čar ta yă Võ Thị Ánh Xuân pel ĕp bruă prap lui hrơi plĕ hră ƀơi Lâm Đồng

Đĭ pơhiăp amăng mông mă bruă, Kơ-iăng khua mir sir dêh čar ta yă Võ Thị Ánh Xuân lăng yôm bruă prap lui hrơi plĕ hră amăng djop mơta ƀơi tơring čar Lâm Đồng: laih dong pơtă pơtăn, Lâm Đồng tŏ tui pơtrut kơtang bruă pơtô pơblan kơ tal plĕ hră brơi tong ten, biă mă ñu lĕ hơdôm kual ataih, asuek, kual mơnuih djuai ania ƀiă dŏ hơdip, pơpha mơnuih mơng Khul git gai Jơnum min plĕ hră nao tơl plơi pla mơng hrơi anai kiăng kơ hmao tlâo pơsir hĭ bruă aka ƀu klă tơdah hmâo, pơhlôm bruă prap lui hrơi plĕ hră dưi pơphun rơnuk rơnua, djơ̆ hăng hrơi pơkă.

Siu Đoan: Pơblang