VOV4.Jarai - Mơguah (7/5), Grup hyu mă bruă mơng Khul pơphun plĕ hră ruah khua dêh čar yua kơ Kơ-iăng Khua pơ ala mơnuih ƀon sang dêh čar ơi Đỗ Bá Tỵ, Ding kơna Khul pơphun plĕ hră dêh čar, Khua grup pơhlôm rơnuk rơnua, hơđong ba jơlan hlâo hơmâo mông mă bruă hăng Jơnum min plĕ hră ruah khua tơring čar Khánh Hòa pel ĕp kơ bruă prap lui plĕ hră ruah Khua pơ ala mơnuih ƀon sang dêh čar tal 15 hăng Khua khul pơ ala mơnuih ƀon sang djop gưl, rơwang thun 2021-2026. Tui hăng Jơnum min plĕ hră tơring čar Khánh Hòa, đơ đam tơring čar hơmâo rơbêh 970 rơbâo čô mơnuih amra nao plĕ hră, hăng rơbêh 960  anih pơphun plĕ hră. Tơring čar hơmâo akŏ pơjing 3 anih anom pơphun plĕ hră ruah Khua pơ ala mơnuih ƀon sang dêh čar tal XV, 14 anih pơphun plĕ hră ruah khua khul pơ ala mơnuih ƀon sang tơring čar.

Kơ-iăng Khua pơ ala mơnuih ƀon sang dêh čar ơi Đỗ Bá Tỵ git gai kiăng kơ tal plĕ hră ruah Khua pơ ala mơnuih ƀon sang dêh čar hăng Khua khul pơ ala mơnuih ƀon sang pơhlôm tơpă sit, bơkơnar, djơ̆ tơlơi phiăn, rơnuk rơnua, pơkrem, jơnum min plĕ hră tơring čar kiăng kơ kiăo tui lăng, pel ĕp bruă prap lui ƀơi ƀon lan, pel ĕp tong ten, jŭ yap rơđah ƀing mơnuih dưi nao plĕ hră, biă mă ñu mrô mơnuih glăk hyu mă akan hơdang amăng ia rơsĭ. Ƀơi anăp kơ tơlơi tơnap tap mơng klin Covid-19, Kơ-iăng Khua pơ ala mơnuih ƀon sang dêh čar ơi Đỗ Bá Tỵ rơkâo tơring čar Khánh Hòa pok pơhai kjăp hơdôm hơdră pơgang klin.

Siu Đoan: Pơblang