VOV4.Jarai - Ƀơi tơring čar Kon Tum bruă pôr pơhing, pơtô pơblang kơ bruă ruah Khua pơ ala mơnuih ƀon sang dêh čar tal 15 hăng Khua jơnum min pơ ala mơnuih ƀon sang djŏp gưl glăk hơmâo pơtrut ngă kơtang. Yua hơmâo lu hơdră pôr pơhing mơn, yua hnun mơnuih ƀon sang tañ hmư̆ hing, amuñ thâo hluh kơ tơlơi yôm mơng bruă plĕ hră ruah khua ăt kah hăng tơlơi dưi, tơlơi gơgrong bruă mơng pô hăng bruă jơnum yôm mơng djuai ania ta.

Amăng hơdôm hrơi anai, abih bang 84 boh plơi pla, 11 boh să, tơring kual tơring glông Đăk Hà, ƀơi ƀơi lêng ƀuh anŏ prăp rơmet dik dak, anăp nao hrơi jơnum prong mơng djuai ania ta, hrơi ruah Khua pơ ala mơnuih ƀon sang dêh čar tal 15 hăng Khua jơnum min mơnuih ƀon sang djŏp gưl. Yă Nguyễn Thị Thắm, Khua anom bruă gru grua - pôr pơhing tơring glông Đăk Hà brơi thâo, amăng bruă pôr pơhing ruah khua tal anai, hrŏm hăng tơlơi pôr pơthâo mơng hơđăp, tơring glông pơtrut đĭ tơlơi gêh gal phrâo, mă yua boh thâo măi mok pôr pơhing, djru ƀing kư tri hăng mơnuih ƀon sang dưi ruah mă tơlơi pơhing hơget gơñu či hmư̆:

“Gơmơi mă yua boh thâo măi mok amăng bruă pôr pơhing. Mơnuih ƀon sang dưi hmư̆ ƀơi anăp tơlơi pơhing ruah khua amăng telephôn rơgơi rơnuk phrâo. Gơmơi ăt gơñăm nao bruă pôr pơthâo amăng Zalo, Facebook, anun lĕ glông pôr Hră pơhing phrâo Đăk Hà, Tơlơi pơhing Đăk Hà, Đăk Hà 24h. anun lĕ plang yua anom bruă, ƀing hyu pơtô pơblang pơkra mă hăng wai lăng kiăng pơtô pơblang kơ abih bang mơnuih ƀon sang thâo”.

Lăi pơthâo bruă ruah khua amăng glông pôr pơhing tơring glông Đăk Hà.

Pơsit bruă pôr pơhing kơ bruă ruah khua lĕ bruă yôm mơng lŏn ia ta, gong gai hăng djŏp anom bruă mơng tơring glông Đăk Hà hơmâo lăng ba biă mă kơ tơlơi anai. Yă Phạm Thị Thương, Kơ-iăng khua jơnum min mơnuih ƀon sang tơring glông Đăk Hà, Kơ-iăng khua Jơnum min ruah khua tơring glông brơi thâo, kiăng mơnuih ƀon sang amuñ thâo hluh djŏp tơlơi pơhing, tơring glông hơmâo pôr pơthâo kơ bruă ruah khua kiăo tui rim akŏ bruă, rim črăn laih dong pôr pơhing tui lu hơdră phara:

“Tơring glông hơmâo pok plang pôr pơhing, tơlơi pôr pơhing amăng brô̆, pơdah amăng tivi. Giong anun čih amăng plang pôr pơhing điện tử, plang internet mơ̆ tơring glông pơjing. Hơdôm anom apăn bruă pơ să, tơring kual lĕ hyu pơtô pơblang ƀơi rơdêh hăng ƀơi lua amăng plơi pla. Pôr pơthâo hăng ƀang điện tử, panô, ap phich...Laih dong tơring glông ăt lăi pơthâo kơ ƀing khua, mơnuih mă bruă kơnuk kơna hăng mơnuih ƀon sang thâo hluh rơđah djŏp tơlơi pơkôl pơkă, mơng anun ngă tui tơlơi dưi hăng tơlơi kiăng ngă amăng bruă ruah khua mơng pô hăng hlong nao plĕ hră mă pô”.

Pôr pơthâo bruă ruah khua hăng lua pôr amăng tơring glông Đăk Hà.

Yua hơmâo pôr pơhing hăng lu hơdră phara, tơlơi pôr pơthâo tañ hơdor lui, amuñ thâo hluh mơn, yua hnun abih bang ƀing kư tri hăng mơnuih ƀon sang tơring glông Đăk Hà thâo hluh kơ bruă ruah khua, kơ tơlơi dưi hăng tơlơi gơgrong bruă mơng ƀing gơñu amăng bruă ruah khua. Ơi Trần Đình Vân, 72 thun, dŏ pơ ƀut plơi 7, tơring kual Đăk Hà brơi thâo, ƀơi ƀut plơi ñu, mơnuih ƀon sang thâo rơđah laih tơlơi pơhing ruah khua. Hơdôm hrơi anai, mơnuih ƀon sang glăk pơblăi nao rai lu biă kơ 8 čô khua hơmâo anăn ba ruah ngă Khua pơ ala mơnuih ƀon sang dêh čar, 85 čô khua ba ruah ngă khua jơnum min pơ ala mơnuih ƀon sang tơring čar, 58 čô khua jơnum min pơ ala mơnuih ƀon sang tơring glông hăng ƀing khua pơ ala mơnuih ƀon sang tơring kual, kiăng lơ 23/5 pơ anăp anai pơdah tơlơi dưi, tơlơi gơgrong bruă mơng pô hăng rim pok hră plĕ:

“Thun anai, hơmâo tơlơi yôm lĕ ruah Khua pơ ala mơnuih ƀon sang dêh čar hăng Khua jơnum min pơ ala mơnuih ƀon sang djŏp gưl. Gơmơi lĕ mơnuih dŏ hơdip pơ plơi pla, jing lăng nao biă kơ bruă anai, hmư̆ tui amăng brô̆, amăng tivi, jơnum plơi pla, jơnum grup ping gah, jơnum ƀing tha amăng plơi gơmơi lêng hmư̆ lăi nao soh. Abih bang tơlơi jơnum anun lêng lăi nao kơ bruă ruah Khua pơ ala mơnuih ƀon sang dêh čar hăng Khua jơnum min pơ ala mơnuih ƀon sang djŏp gưl. Gơmơi đăo gơnang amra hơmâo ruah ƀing mơnuih klă, rơgơi, hơmâo mơnuih ƀon sang đăo gơnang”.

Grup hyu hơduah ĕp, krăp lăng bruă ruah khua mơng Khua mua apăn bruă Jơnum min djŏp djuai ania mơnuih mơnam Việt Nam bơni biă kơ bruă pôr pơthâo ruah khua mơng Đăk Hà.

Khoa Điềm: Čih - Siu H’Mai: Pơblang