VOV4.Jarai - Anom bruă lăi pơthâo tơlơi pơhing lŏn pơpư̆ hăng ia rơsĭ bluk - Anom bruă Vật lý Địa cầu (Anom kơsem min boh thâo ia rơgơi phrâo Việt Nam) brơi thâo, lơ̆m 3 mông 18 mơnit mơguah lơ 5/5, hơmâo tơlơi truh lŏn pơpư̆ prong 2.6 ƀơi tơring glông Kon Plong, tơring čar Kon Tum. Mrô tơlơi truh sat lĕ mrô 0. Ăt tui tơlơi pơsit mơng Anom pôr pơthâo tơlơi pơhing lŏn pơpư̆ hăng ia rơsĭ bluk mơn, amăng hơdôm hrơi rơgao, tơring čar Kon Tum hơmâo lu wơ̆t lŏn pơpư̆. Rơđah biă ñu, amăng lơ 4/5, sa tơlơi truh lŏn pơpư̆ prong 3.0 hơmâo ƀơi tơring glông Kon Plong. Bơ hlâo kơ anun, amăng lơ 2/5, ăt ƀơi tơring glông Kon Plong mơn, hơmâo 2 wơ̆t lŏn pơpư̆. Lơ 1/5 ăt hơmâo 2 wơ̆t lŏn pơpư̆ mơn ƀơi tơring glông Kon Plong, tơring čar Kon Tum. Tui anun, yap kơnong mơng akŏ blan 5 truh ră anai, tơring čar Kon Tum hơmâo 6 wơ̆t lŏn pơpư̆. Anom bruă pôr pơthâo tơlơi truh lŏn pơpư̆ hăng pơhŭi hlâo ia rơsĭ bluk - Anom bruă Vật lý Địa cầu ăt glăk krăp lăng hơdôm tơlơi truh anai mơn.

Siu H’Mai: Pơblang