VOV4.Jarai - Mơng akŏ thun truh ră anai ƀơi tơring čar Kon Tum hơmâo 15 čô čơđai djai ia ƀlung. Čơđai ia ƀlung jai hrơi lu tui khŏm kiăng gong gai, anom bruă ngă rơđah yua hơget hơmâo tơlơi truh anai laih dong hơmâo hơdră pơgang klă. Tơlơi lăi glăi mơng pô hyu mă tơlơi pơhing phrâo Khoa Điềm, dŏ pơ kual Dap Kơdư.

Giăm sa blan rơgao dong mơng hrơi 3 čô čơđai sang hră anih 5B, sang hră gưl sa Nguyễn Bá Ngọc, să Hòa Bình, plơi prong Kon Tum djai ia ƀlung, samơ̆ ơi Đinh Công Hoàng, Khua git gai grup ping gah ngă rah Khua plơi thôn 5 ăt dŏ bral mơn. Ơi Hoàng brơi thâo, anih hơmâo tơlơi truh ƀlung ia ngă 3 čô čơđai djai lĕ sa boh dơnao ia ƀơi tơkai bơnư̆ pơđoh ia dăo Ia Ƀăng. Rim wơ̆t brưh nao jơlan anai, ñu ruă ñip amăng akŏ yua hơdor glăi tơlơi truh ƀlung ia anun:

“Lơ̆m anun yang hrơi hơhuñ mơmot yơh mơng đuăi nao ĕp ană, ĕp amon. Lơ̆m hmư̆ hing arăng ƀuh ƀing čơđai nao ngui giăm pơ đang kơsu anai, lơ̆m mut nao lăng ƀuh rơdêh tang wang hăng sum ao pioh pơ đang kơsu, giong anun kah mơng jak iâu adơi ayong ñŭ amăng ia ĕp gơñu. Ia hơyah tơ-ut đôč mơ̆ ñŭ ĕp ƀuh 3 čô čơđai mơtăm. Ba đĭ hăng kơdư hrŏm ha wơ̆t mơtăm. Kâo ol kơdol, ƀu truh pơhiăp dong tah”.

Dơnao ia hơmâo 3 čô čơđai hrăm anih 5 ƀơi să Hoà Bình djai.

Yap mơng akŏ thun truh ră anai ƀơi Kon Tum hơmâo 15 čô čơđai djai ia ƀlung. Amăng anun plơi prong Kon Tum hơmâo 8 čô; tơring glông Đăk Glei hơmâo 4 čô; tơring glông Đăk Tô hơmâo 2 čô hăng tơring glông Đăk Hà 1 cô. Sit nik tơhnal ngă hơmâo tơlơi truh ƀlung ia ƀơi tơring čar Kon Tum lĕ yua tơlơi pơmin mơng abih bang kơ bruă pơgang tơlơi truh ƀlung a dŏ kơƀah; čơđai ƀu hơmâo amĭ ama wai lăng, prưh lui ană bă ča čot, laih dong lu čơđai ƀu thâo luai ôh. Ƀơi anăp bruă tơring čar hơmâo lu wơ̆t čơđai djai ia ƀlung, ơi Vũ Văn Đam, Kơ-iăng khua anom pơgang, wai lăng ƀing čơđai hăng Dưm kơnar đah kơmơi đah rơkơi, Gơnong bruă Mơnuih mă bruă - Tơhan rơka hăng Mơnuih mơnam tơring čar Kon Tum brơi thâo, anom bruă glăk pơtrut pơtô pơblang hăng hơmâo lăi pơthâo laih kơ tơring čar git gai pơsir tơlơi anai:

“Ƀing gơmơi pơtrut hloh dong bruă pôr pơhing kiăng sang anŏ thâo hluh hloh, ƀing čơđai hăng abih bang mơnuih gum tơngan pơgang ba ƀing čơđai hŭi djai ia ƀlung. Tơring čar ăt hơmâo hră git gai Jơnum min mơnuih ƀon sang hơdôm boh tơring glông, plơi prong khŏm lăng glăi abih hơdôm anih hơmâo ia krông, ia dơnao, čroh hnoh mơ̆ aka ƀu hơmâo kơƀang pơhŭi lĕ khŏm hlă kơƀang pơhŭi hlâo. Ăt pôr pơhing pơđĭ tơlơi thâo hluh mơng ană plơi pla ăt kah hăng pô sang hơmâo hơdôm boh dơnao hŭi rơhyhưt anun”.

Khua mua gong gai, khul grup nao tơña bla sang anŏ hơmâo ană bă djai ia ƀlung.

Hrŏm hăng bruă pơtô pơblang kiăng thâo hluh kơ bruă pơgang hlâo tơlơi truh ƀlung ia kơ ƀing čơđai, gong gai hăng anom apăn bruă tơring čar Kon Tum ăt glăk pơtrut pơtô brơi ƀing čơđai hrăm luai. Khă hnun, ƀu dưi đơi lơi, yua dah ƀơi tơring čar hơmâo aset biă dơnao hrăm luai, lơ̆m anun dơnao ia hrăm luai amăng sang hră glăk kơƀah prăk či pơkra giong, pioh mă yua.

Khoa Điềm: Čih - Siu H’Mai: Pơblang