VOV4.Jarai - Tlam lơ 11/5, amăng jơnum lăng nao rai amăng tivi hăng 10 boh tơring glông, plơi prong amăng tơring čar, ơi Lê Ngọc Tuấn, Khua Jơnum min mơnuih ƀon sang tơring čar, khua Khul git gai bruă pơgang klin Covid-19 tơring čar Kontum lăi pơtong, amra đong nao pơhlôm brơi anih mă bruă, anih dŏ brơi ƀing mơnuih djru pơgang klin Covid-19. Ƀơi anăp kơ tơlơi tơnap tap ƀu hmao thâo mơng klin kman, tơring čar Kontum glăk hơmâo 4 anih wai lăng, grup pơgang klin ƀơi 3 glông jơlan, hơmâo: Jơlan mrô 14, 24 hăng 40B.

Nai ia jrao pơčrang lăng drơi jăn ƀing mơnuih mut nao tơring čar Kontum ƀơi jơlan mrô 14

Hrŏm hăng anun ƀơi 2 glông guai ataih rơbêh 292 km giăm dêh čar Lao, Kur, ling tơhan pơgang guai lŏn ia gum hrŏm hăng Anom bruă git gai ling tơhan tơringčar hơmâo 70 grup wai lăng pơgang klin Covid-19. Pơsit bruă pơgang klin Covid-19 dŏ sui pơ anăp dong, Khua Jơnum min mơnuih ƀon sang tơring čar Kontum Lê Ngọc Tuấn rơkâo djop tơring glông, plơi prong hơmâo mă yua djop mơta, laih dong tañ blơi gơnam tam kiăng hloh kiăng pơhlôm brơi anih mă bruă, anih dŏ kơ ling tơhan, ƀing mơnuih djru pơgang klin. laih dong brơi Khua Jơnum min mơnuih ƀon sang tơring glông, plơi prong blơi gơnam tam kiăng yua, hăng lăi pơthâo tơdơi samơ̆ kiăng kơ mă yua lăp djơ̆ hăng pơ anăp anai amra dưi mă yua dong pioh pơgang klin kman ƀơi djop ƀon lan.

Siu Đoan: Pơblang