VOV4.Jarai - Amăng hơdôm blan bơyan phang laih rơgao anom bruă bơdjơ̆ nao, gong gai hơdôm plơi pla, anom bruă wai lăng glai hăng mơnuih ƀon sang tơring čar Kontum hơmâo abih pran ngă tui ha wŏt 2 bruă jao akŏ phun, anun lĕ pơgang apui ƀong glai hăng wai lăng kyâo glai.

Hlâo kơ hrơi ƀong tết Tân Sửu truh ră anai anom bruă bơdjơ̆ nao, hơdôm anom bruă wai lăng glai, gong gai ƀon lan, mơnuih ƀon sang hơmâo arăng jao wai lăng glai rưng ƀơi tơring čar Kontum lêng kơ abih pran jua wai gak hŭi kơ apui ƀong glai. Ayong A Cường, dŏ ƀơi ƀut plơi Đăk Kon, să Đăk Rơ Nga, tơring glông Đăk Tô brơi thâo, ană plơi pla arăng jao 270 ektar glai mơng kông ti TNHH sa ding kơna wai đang glai Đăk Tô. Dưi tŭ mă prăk apah lơ̆m wai lăng glai, yua anun rĭm čô mơnuih lêng kơ gơgrong amăng bruă wai lăng glai kyâo.

Gơgrong wai tơhrơi hăng mlăm mơtăm kiăng kơ pơgang hŭi apui ƀong glai. Wai gak amăng hrơi ƀong tết, abih hrơi ƀong tết ăt wai lăng mơn, wai pơgang abih bơyan phang hŭi kơ apui ƀong. Rĭm hrơi ƀing gơmơi lêng kơ hyu tir. Ană plơi pla lêng kơ hyu wai lăng pơplih nao rai.

Ƀơi tơring glông giăm guai Ia H’Drai, anih hơmâo rơbêh 88 rơbâo ektar glai hăng kual lŏn pla glai kyâo, ơi Nguyễn Quốc Tuấn, khua anom bruă wai lăng đang glai tơring glông brơi thâo:

Pơ-iă hang amăng hơdôm hrơi giăm anai, ngă glai rưng krô kreñ amuñ apui ƀong. Ƀing gơmơi ăt pơsit hơdôm kual amuñ apui ƀong kiăng kơ pơpha mơnuih dŏ gak tơhrơi kah hăng mlăm. Hơdôm anom bruă anom bruă hơdôm mơnuih dŏ gak. Ƀing pô anai wai lăng glai rưng rah hăng pơgang hŭi apui ƀong glai rah. Hrŏm hăng anun hơmâo hơdră gum hrŏm hăng hơdôm anom bruă, hăng Jơnum min să laih dong hơdôm anom bruă pơdong amăng kual. Hơdôm anom bruă wai lăng glai kiăng kơ ngă tui djơ̆ hơdră hơmâo jao trun tui 4 mơta bruă ƀơi anih kiăng kơ tañ lơ̆m ƀuh apui ƀong glai.

Bruă wai lăng glai rưng ƀơi tơring čar Kontum amăng hơdôm hrơi laih rơgao ƀu djơ̆ khut khăt kơnong amăng kual glai rưng. Amăng hơdôm tal jơnum bơkơtuai kơ bruă glai rưng, sa tơlơi gơgrong hơmâo pơdah tong ten, anun lĕ tơlơi gir run abih pran jua mơng khua mua tơring čar ăt kah hăng hơdôm anom bruă bơdjơ̆ nao amăng bruă wai pơgang glai rưng glăk hơmâo hăng glai phrâo pla glăi. Amăng jơnum lăng glăi bruă wai pơgang, pơđĭ kyar glai rưng thun 2020; pok pơhai bruă amăng thun 2021 hăng hơdôm thun pơ anăp, khua git gai Ping gah tơring čar Kontum ơi Dương Văn Trang lăi pơtong, kiăng jao tơlơi glăm ba tong ten brơi djop gưl, anom bruă, ƀon lan, anom bruă wai lăng glai hăng pơsir khut khăt ƀing apăn bruă, Ping gah ngă soh amăng bruă wai lăng glai rưng.

Abih bang gưl Ping gah kiăng kơ hrŏm hăng khua mua, git gai na nao bruă wai lăng glai rưng tŭ yua hloh hăng ƀing khua apăn akŏ gưl Ping gah git gai na nao tơdah dŏ lu anŏ aka ƀu klă, ƀing khua apăn akŏ gưl Ping gah kiăng kơ glăm ba hlâo. Jơnum min mơnuih ƀon sang tơring čar, Jơnum min mơnuih ƀon sang tơring glông, Jơnum min mơnuih ƀon sang să, hơdôm anom bruă arăng jao wai pơgang glai rưng kiăng pơjing akŏ bruă, kiăng kơ git gai bruă pel ĕp na nao. Tơdah pơtah tai ba truh tơlơi ngă soh amra glăm ba ƀơi anăp Ping gah tơring čar. Pơsir khut khăt ƀing apăn bruă, Ping gah ngă soh hăng tơlơi pơkă, bruă jao amăng wai pơgang glai rưng.

Tơring čar Kontum glăk abih pran jua amăng bruă wai pơgang giăm 549.000 ektar glai hlô, rơbêh 61.600 ektar đang glai phrâo pla glăi hăng pơkă amăng 5 thun pơ anăp anai pla glăi dong 15.000 ektar đang glai. Kiăng kơ dưi ngă, sa amăng hơdôm bruă akŏ phun mơ̆ tơring čar Kontum pơsit kiăng tŏ tui ngă tŭ yua hloh hơdră apah prăk wai pơgang glai rưng hăng pơđĭ kyar đang glai.

Siu Đoan: Pơblang