VOV4.Jarai - Kơ-iăng khua Jơnum min mơnuih ƀon sang tơring čar Kontum hơmâo mông mă bruă hăng khua mua tơring glông Kon Plông hăng să Măng Cành kơ bruă măt gơnam ƀong huă ƀơi să Măng Cành. Amăng mông mă bruă, Gơnong bruă ia jrao brơi thâo hơmâo mă gơnam kiăng pơčrang lăng yua hơget ba truh tơlơi anai, gum hrŏm hăng ƀon lan pơsur mơnuih ƀon sang lui hĭ abih gơnam ƀong huă him lăng amra ngă măt. Hăng ƀing mơnuih măt gơnam ƀong, gơnong bruă ia jrao arăng him lăng ƀong djơ̆ jrao mă Clostridium botulinum hăng glăk pơjrao brơi ƀing mơnuih anai.

Kơ-iăng khua Jơnum min mơnuih ƀon sang tơring čar git gai tơring glông Kon Plông đing nao bruă pơtô pơblang kiăng mơnuih ƀon sang thâo hluh rơđah kơ gơnam ngă măt, anăm brơi bơbeč sat nao bruă pơhưč tuai čuă ngui amăng tơring glông  laih dong gơnong bruă ia jrao ječ ameč pel ĕp, ngă rơđah yua hơget ngă măt gơnam ƀong huă, prap lui yua kơ hŭi hơmâo lu dong mơnuih măt gơnam ƀong huă, pơlir hăng bruă pok pơhai hơdôm hơdră pơhlôm gơnam ƀong huă hơdjă amăng tal plĕ hră pơ anăp anai.

Siu Đoan: Pơblang