VOV4.Jarai - Ƀơi anăp tơlơi klin Covid-19 pơplih tañ, tơnap him lăng, kiăng gơgrong hlâo pơgang klin, Jơnum min mơnuih ƀôn sang tơring čar Kontum hmâo pơsit pơdơi hơdôm bruă mă ƀu kiăng đơi mơng 12 mông mlăm lơ 6/5. Kiăo tui anun Jơnum min mơnuih ƀôn sang tơring čar Kontum rơkâo hơdôm bôh gơnong bruă, grŭp, anom bruă gah tơring čar; Jơnum min mơnuih ƀôn sang 10 bôh tơring glông, plơi prong mơng 12 mông mlăm lơ 6/5 ƀu pơphun hơdôm tơlơi jơnum tum pơƀut, bruă tum pơƀut lu mơnuih ƀu kiăng đơi. Pơdơi jăng jai bruă mă mơng hơdôm bôh anom bơwih ƀong sĭ mơdrô ƀu kiăng đơi, amra ngă lar tưp hyu klin Covid-19.

Lăi pơhing pơgang klin Covid-19 ƀơi kual neh wa djuai ania ƀiă tơring čar Kontum

Hăng hơdôm bôh anom bơwih ƀong sĭ mơdrô kiăng yua pơkon dưi mă bruă samơ̆ ngă tui tơpă hơdôm bruă pơgang, pơgăn klin Covid-19, ƀu tum pơƀut lu mơnuih. Ngă tui tơpă bruă gôm adung mơbah, pel ĕp pơ-iă drơi jăn, agaih rơnăk tơngan hăng ia pơdjai kơman ƀơi tơngan tañ ƀudah yua ia čơƀu... ƀơi anih lu mơnuih jưh hăng hơdôm bôh ƀirô, anom bruă, anih anom pơkra gơnam tam. Gơnong bruă pơtô pơhrăm tơring čar Kontum ăt hmâo pơsit laih mơn pơplih pơkra hrơi pel ĕp anô̆ kơjăp tal hrăm tal 2, thun hrăm 2020-2021 hơdôm gưl hrăm tañ hloh 1 rơwang hrơi tơjuh bơhmu hăng kơčăo bruă blung a./.

Siu H’ Prăk: Pô pơblang