VOV4.Jarai - Mơguah lơ 28/4, ƀơi plơi prong Kontum, Jơnum min pơ ala mơnuih ƀôn sang tơring čar Kontum tal 11 pok phun tal jơnum lok 12, ăt lĕ tal jơnum klah čun rơwang bruă 2016-2021. Mơng akô̆ rơwang bruă truh hlâo kơ tal jơnum lok 12 klah čun rơwang bruă, Jơnum min pơ ala mơnuih ƀôn sang tơring čar Kontum tal 11 hmâo pơphun truh kih 19 tal jơnum, amăng anun hmâo 11 tal jơnum tui tơđar hăng 8 tal jơnum tui akô̆ bruă; Mă yua 299 Tơlơi pơtrun pơsit ngă gru than pioh hơdôm gơnong bruă, hơdôm gưl pơphun pok pơhai ngă tui.

Hơdôm tơlơi pơtrun pơsit Jơnum min pơ ala mơnuih ƀôn sang tơring čar Kontum mă yua dưi pơsit hmao tlôn rơđah rơđông jơlan gah, hơdră pơtrun mơng Ping gah, hơdră bruă, tơlơi phiăn mơng Kơnuk kơna, djơ̆ hăng bôh nik ƀơi tơring čar tañ mut măng tơlơi hơdip mơda dưi hmâo anom bơwih ƀong, mơnuih ruah khua hăng mơnuih ƀôn sang tŭ ư hrom, dŏng yua. Amăng 2 hrơi pơphun tal jơnum lok 12, Jơnum min pơ ala mơnuih ƀôn sang tơring čar Kontum tal 11 amra pel ĕp 65 mơta bôh yôm, hmâo 14 mơta tơlơi lăi pơthâo glăi hăng 51 mơta hră lăi pơthâo, čih pơkra Tơlơi pơtrun pơsit. Amăng anun lu bôh yôm dưi čơkă mă tơlơi lăng ba mơng mơnuih ƀôn sang amăng tơring čar, kah hăng: Hơdră pơhrui hăng mă yua rơnoh prăk nô̆p ruah čơđai hơdôm gưl hrăm; Gah gum djru anom bơwih ƀong anet hăng găp ƀrô amăng tơring čar Kontum mơng thun 2021-2025; Tơlơi pơsit hơdră pơtrun tuh pơplai, pơplih pơkra hơdră pơtrun tuh pơplai hăng sa dua rơwang bruă tuh pơplai gah tơlơi dưi mơng Jơnum min pơ ala mơnuih ƀôn sang tơring čar./.

Siu H’ Prăk: Pô pơblang