VOV4.Jarai - Lơ 2/4, ƀơi plơi prong Kontum, Ping gah tơring čar Kontum pơphun Jơnum lok 3 Khul apăn bruă Ping gah tơring čar Kontum tal XVI. Sa amăng hơdôm boh tơhnal hơmâo Jơnum đing nao pơčrông sai lĕ bruă man pơdong plơi pla phrâo. Truh ră anai tơring čar Kontum hơmâo 28 boh să hơmâo tŭ yap lĕ să plơi pla phrâo. Laih dong hơmâo 10 boh să dưi ngă mơng 15 truh pơ 18 hơnong pơkă; 45 boh să dưi ngă mơng 10 truh pơ 14 hơnong pơkă hăng 2 boh să dưi ngă mơng 8 truh pơ 9 hơnong pơkă.

Khua git gai Ping gah tơring čar Kontum Dương Văn Trang pơhiăp amăng mông jơnum

Ping gah tơring čar Kontum pơkă amăng 5 thun pơ anăp anai gir run hơmâo 4 boh tơring lông hăng plơi prong Kontum dưi ngă pơgiong hơnong pơkă plơi pla phrâo ƀudah pơgiong abih hơnong pơkă plơi pla phrâo. Kiăng kơ ngă pơgiong, Ping gah tơring čar Kontum pơsit kiăng pok pơhai, ngă klă 8 grup bruă jao, hơdră bruă anun lĕ: kơtưn pơtô pơblang amăng man pơdong plơi pla phrâo; klă dong amăng dưm dăp, wai lăng hăng ngă tui akŏ bruă dưm dăp phrâo hloh lĕ pơđĭ kyar ngă hmua, ƀon lan, tuh pơ alin man pơkra anih anom bơwih ƀong huă - mơnuih mơnam ƀơi ƀon lan pơlir hăng pơđĭ kyar plơi prong; pơplih ngă hmua kiăng hơmâo lu dong prăk pơhrui kơ mơnuih ƀon sang; klă dong amăng pơtô hrăm, ia jrao hăng gru grua ….

Siu Đoan: Pơblang