VOV4.Jarai - Ƀrô tal hơdor glăi 41 thun hrơi pioh hơdor ƀing mơnuih drơi jăn ƀu klă Việt Nam (18/4), mơguah lơ (15/4), ƀơi plơi prong Kontum, Khul wai pơgang ƀing čơđai hăng mơnuih drơi jăn ƀu klă amăng tơring čar Kontum pơphun Jơnum kiăng pơpŭ ƀing mơnuih drơi jăn ƀu klă hrưn đĭ mut hrŏm hăng abih bang mơnuih hăng Grup gum djru ba gru tal VI thun 2021. Ƀơi mông Jơnum 100 čô mơnuih drơi jăn ƀu klă hơdip ba gru, hrăm hră rơgơi, thâo bơwih ƀong huă, sĭ mơdrô, djru ba tơdruă hơmâo arăng pơpŭ bơni hăng ƀơk gơnam.

Anai lĕ ƀing mơnuih ba gru amăng mrô rơbêh 6.200 čô mơnuih drơi jăn ƀu klă amăng tơring čar Kontum hơmâo lu tơlơi gir run găn rơgao tơnap tap, lui hĭ mlâo hrưn đĭ amăng tơlơi hơdip. Ƀrô tal anai Jơnum min mơnuih ƀon sang tơring čar Kontum hơmâo jao hră pơpŭ brơi 1 grup hăng 1 čô mơnuih hơdip ba gru lơ̆m thâo djru ba tơdruă; Khul pơgang tơlơi dưi kơ ƀing čơđai hăng mơnuih drơi jăn ƀu klă amăng tơring čar Kontum hơmâo jao hră pơpŭ brơi 18 čô mơnuih ba gru hrưn đĭ mut hrŏm abih bang mơnuih.

Siu Đoan: Pơblang