VOV4.Jarai - Amăng dua hrơi lơ 26 hăng 27/4, ƀơi plơi prong Kontum, Khul pơlir hơbit đah kơmơi tơring čar Kontum pơphun pơhrăm prăp lui bôh thâo hăng hơdră phrâo kơ đah kơmơi tơbiă anăn tal blung a kơ khua pơ ala Jơnum min pơ ala mơnuih ƀôn sang hơdôm gưl rơwang bruă 2021-2026.

Gum hrom anih pơhrăm, giăm hmâo 200 čô đah kơmơi tơbiă anăn tal blung a gum hrom tơbiă anăn kơ khua pơ ala Jơnum min pơ ala mơnuih ƀôn sang hơdôm gưl mơng tơring čar Kontum, rơwang bruă 2021-2026 dưi prăp lui dong bôh thâo kơ Khua pơ ala mơnuih ƀôn sang dêh čar ta hăng Jơnum min pơ ala mơnuih ƀôn sang; thâo hluh dong tơlơi pơkă kơ pơsur ruah khua; bruă mă mơng Khul pơlir hơbit đah kơmơi hơdôm gưl gum hrom ruah khua pơ ala mơnuih ƀôn sang dêh čar ta hăng Jơnum min pơ ala mơnuih ƀôn sang; dưi ngă tui tŏng teng bruă bưp hăng lăi pơthâo, pơdŏng gru rŭp pô; mă tŭ bôh thâo phrâo lăi pơdah, lăi glăi tơlơi tơña mơng mơnuih ruah khua. Rơngiao kơ anun đah kơmơi tơbiă anăn tal blung a gum hrom tơbiă anăn kơ Jơnum min pơ ala mơnuih ƀôn sang hơdôm gưl mơng tơring čar, dŏ dưi sa dua čô khua pơ ala gum hrom lu tal Khua pơ ala mơnuih ƀôn sang dêh čar ta, Jơnum min pơ ala mơnuih ƀôn sang tơring čar lăi pơthâo tơlơi găn rơgao sit nik amăng bruă mă kiăng thâo tơlơi čang rơmang mơng mơnuih ruah khua ăt kah hăng tơlơi gum pơhiăp gum hrom hơdôm bôh yôm mơng tal jơnum./.

Siu H’ Prăk: Pô pơblang