VOV4.Jarai-Kơ-iăng Khua dêh čar ơi Vũ Đức Đam phrâo kĭ hră pơtrun mrô 128/NQ-CP mơ̆ng kơnuk kơna pơtrun jăng jai “Bong glăi rơnuk rơnua, beč bal, pel ĕp tŭ yua klin Covid 19”. Mơ̆ng tơlơi pơhing hơmâo sit nik, tơlơi pơgôp hiăp, pơblang rơđah ƀing mơnuih rơgơi kơhnâo, mơnuih kơhnăk bruă, lu tơlơi pơgôp híăp mơ̆ng lu tơring čar hăng Khul git gai mơ̆ng dêh car pơhlôm, pơgang klin Covid 19, kơnuk kơna dêh čar pơtong rơđah tơhnal pơtrun anăp nao bruă pơhlôm, pơgang klin ăt bruă mă phun kiăng pơgang tơlơi suaih pral kơ mơnuih ƀôn sang, rŭ glăi, bơwih ƀong huă mơnuih mơnam, pơgang tơlơi rơnuk rơnua dêh čar; pơblih anăp ngă bruă pơhlôm, pơgang klin tui jơlan gah “bong glăi rơnuk rơnua, beč bal, pel ĕp tŭ yua klin covid 19”.

Tơlơi pơtrun anai khom pơgang tong ten tơlơi suaih pral kơ mơnuih ƀôn sang; pơgăn ƀiă hloh mrô mơnuih ƀă kman, mơnuih jing duăm kraih, djai brŭ yua klin covid 19; rŭ glăi hăng pơđĭ kyar bơwih ƀong huă mơnuih mơnam, pơgang hơđong dêh čar; ngă tui mơdua bruă pơtrun, ba dêh čar ta pơblih ngă bruă kah hăng tơđar tañ hloh.

Nay Jek: Pơblang