VOV4.Jarai - Mơguah lơ 7/4, Khua dêh čar ơi Phạm Minh Chính hơmâo lăi pơthâo Khua pơ ala mơnuih ƀon sang dêh čar kơ tơlơi pơsit brơi pơdơi bruă sa čô kơ-iăng khua dêh čar, sa, dua Khua ding jum hăng khua mua pơkŏn amăng Kơnuk kơna. Tui anun, Khua pơ ala mơnuih ƀon sang dêh čar sem lăng bruă brơi pơdơi bruă kơ Kơ-iăng khua dêh čar ta ơi Trịnh Đình Dũng, sa, dua čô khua ding jum hăng khua mua hơdôm anom bruă bơkơnar Ding jum. Dưm dăp glăi mrô khua mua amăng Kơnuk kơna rơwang mă bruă tal XIV hơmâo 27 čô ding kơna anun lĕ: Khua dêh čar, 5 čô kơ-iăng khua dêh čar hăng 21 čô khua ding jum, Khua anom bruă bơkơnar khua ding jum.

Kơ-iăng khua dêh čar ta ơi Trịnh Đình Dũng

Amăng mông Jơnum ruah khua Ping gah đơ đam dêh čar tal XIII laih rơgao, hơmâo 9 čô ding kơna Kơnuk kơna ƀu hơmâo ruah amăng Khul apăn bruă tal XIII, amăng anun hơmâo 8 čô khua mua ƀu ruah ngă khua dong yua kơ thun tha. Tơdơi kơ Khua pơ ala mơnuih ƀon sang dêh čar  pơčrông sai ƀơi grup kơ boh tơhnal anai, khua mua amra pơphun tŭ yap tơlơi rơkâo kơ bruă brơi pơdơi bruă kơ-iăng khua dêh čar ơi Trịnh Đình Dũng hăng sa, dua čô khua ding jum hăng khua mua pơkŏn amăng Kơnuk kơna tui hơdră plĕ hră hơgŏm. Tơdơi anun, Khua dêh čar ta amra mơ-it hră čih anăn kiăng Khua pơ ala mơnuih ƀon sang dêh čar tŭ yap bruă ruah pơplih hĭ khua mua phrâo pơdơi bruă.

Siu Đoan: Pơblang