VOV4.Jarai - Čơtlăm lơ 7/5, ƀơi tơring čar Daklak, yă Trương Thị Mai, Ding kơna Ding jum kơđi čar, Khua apăn bruă git gai Ping gah dêh čar, Khua Grŭp pơphun bruă Ping gah dêh čar hmâo git gai jơnum pok pơhai Tơlơi pơsit mơng Ding jum kơđi čar kơ bruă mơnuih apăn bruă.

Yă Trương Thị Mai ƀơk Tơlơi pơsit, ƀơk bơnga hơ-ư̆č Khua git gai Ping gah tơring čar Daklak Nguyễn Đình Trung

Amăng mông jơnum, ơi Nguyễn Thanh Bình, Ding kơna Ping gah dêh čar, Kơ-iăng Khua Grŭp apăn bruă pơphun bruă mă m Ping gah dêh čar hmâo lăi pơthâo Tơlơi pơsit mrô 84/2021 mơng Ding jum kơđi čar kơ bruă ba mơnuih, pơpha bruă kơ ơi Nguyễn Đình Trung, Ding kơna Ping gah dêh čar, Kơ-iăng Khua git gai Ping gah tơring čar, Khua Jơnum min mơnuih ƀôn sang tơring čar Daknông pơdơi ngă Kơ-iăng Khua git gai Ping gah tơring čar, Khua Jơnum min mơnuih ƀôn sang tơring čar Daknông kiăng gum hrom Grŭp mă bruă, Grŭp apăn bruă hăng ngă Khua git gai Ping gah tơring čar Daklak rơwang bruă 2020-2025.

Ơi Nguyễn Đình Trung, Ding kơna Ping gah dêh čar, Khua git gai Ping gah tơring čar Daklak đĭ pơhiăp čơkă tŭ bruă apăn

Pơhiăp amăng mông jơnum, yă Trương Thị Mai brơi thâo, ơi Nguyễn Đình Trung lĕ mơnuih apăn bruă git gai hlăk ai dưi pơtô pơhrăm phun, dưi pơhrăm rơgao lu bruă apăn, bruă mă pha ra, rơgao 24 thun mă bruă ƀơi hơdôm bôh tơring čar Dăp Kơdư. Yua anun hăng bruă apăn phrâo, ơi Nguyễn Đình Trung amra ngă tui dong bruă mă, bôh thâo mơng pô kiăng djru pơdŏng tơring čar Daklak pơđĭ kyar tañ, kơjăp phik./.

Siu H’ Prăk: Pô pơblang