VOV4.Jarai- Rơwang hrơi tơjuh rơgao, Jơnum min mơnuih ƀôn sang tơring čar Lâm Đồng hơmâo mông mă bruă hăng Jơnum min mơnuih ƀôn sang Việt Nam dŏ pơ dêh čar tač rơngiao ƀơi ƀôn prong Hồ Chí Minh hrom hăng ƀing ngă bruă sĭ mơdrô lĕ mơnuih djuai Việt Nam, mơnuih dêh čar tač rơngiao, kiăng lăi pơthâo tơlơi pơhing, pơtruh nao rai bruă tuh pơ alin, sĭ mơdrô pioh kơ mơnuih sĭ mơdrô mơ̆ng Việt Nam dŏ pơ tač rơngiao thâo, laih anun iâu pơthưr pok pơhai hơdôm kơčăo bruă bơwih ƀong ƀơi tơring čar.

Tơring čar Lâm Đồng lăi pơthâo hăng grup mă bruă Jơnum min wai lăng mơnuih djuai ania Việt Nam dŏ pơ tač rơngiao ƀơi ƀôn prong Hồ Chí Minh hăng ƀing ngă bruă sĭ mơdrô, tuh pơ alin, mơnuih djuai ania Việt Nam dŏ pơ tač rơngiao thâo kơ tơlơi gêh găl, anŏ dưi hơmâo mơ̆ng Lâm Đồng; pơthâo brơi tơlơi pơhing hơdôm kơčăo bruă hlăk iâu pơthưr tuh pơ alin kah hăng:

Kơčăo bruă tuai čuă ngui dơnao Prenn, kơčăo bruă pơdong plơi prong phrâo hiam Liên Khương-Prenn, anih tuai čuă ngui dêh čar ƀơi dơnao Tuyền Lâm…Tui hăng ơi Nguyễn Văn Châu, Kơ-iăng Khua Gơnong bruă Ngă hmua hăng Pơđĭ kyar plơi pla Lâm Đồng lăi, rơngiao kơ tơlơi gêh gal kơtang gah bruă tuai čuă ngui rĭm thun hơmâo 7 klăk wơ̆t tuai nao rai ƀơi Lâm Đồng, tơring čar anai dŏ hơmâo tơlơi gêh găl ngă hmua ba yua boh thâo ia rơgơi.

Yua kơ anun, tơring čar hlăk pơtum pôr pơthâo, iâu pơthưr hăng pơhưč lu mơnuih ngă bruă sĭ mơdrô tuh pơ alin amăng dêh čar, wơ̆t hăng mơ̆ng dêh čar tač rơngiao.

“Ta dưi lăi bruă ngă hmua ƀơi Lâm Đồng pơđĭ kyar sit mơ̆n ƀu kơƀah ôh mơnuih ngă bruă sĭ mơdrô, biă mă ñu ƀing ngă bruă sĭ mơdrô mơ̆ng  tač rơngiao pioh kơ bruă ngă hmua ƀơi tơring čar, anăp nao pơ anih sĭ mơdrô prong, pơđĭ tui rơnoh gơnam tam sĭ mơdrô hăng rŏng lŏn tơnah.

Boh nik ñu gơnam sĭ mơdrô mơ̆ng hơdôm mơta boh troh hơmâo rơnoh yom kah hăng kơphê, phun kơbuă, añăm pơtăm, bơnga hăng rông rơmô djet ia tơsâo…Tơdah ƀing sĭ mơdrô tuh pơ alin ĕp lăng tong ten bruă tuh pơ alin amra djru tơring čar Lâm Đồng pơđĭ kyar”.

Tơdơi kơ mă bruă hăng tơring čar, grup khua mua Jơnum min wai lăng mơnuih djuai ania Việt Nam dŏ pơ dêh čar tač rơngiao ƀơi ƀôn prong Hồ Chí Minh hăng djop anom bruă sĭ mơdrô, ƀing tuh pơ alin mă bruă hăng tơring glông Lạc Dương, hyu čuă lăng Group Liên Minh, kông ty pơkra ming gơnam boh troh đang hmua Langbiang hăng ĕp lăng kơčăo bruă tơring čar Lâm Đồng iâu pơthưr tuh pơ alin.

Ơi Steve Bùi, Khua phun Group Delta E Ĭ C Japan brơi thâo, ră anai lu mơnuih ngă bruă sĭ mơdrô, ƀing bơwih ƀong huă sĭ mơdrô yua djuai ania Việt dŏ pơ dêh čar tač rơngiao ngă pô, jai hrơi kiăng glăi tuh pơ alin pơ dêh čar ta pô. Yua kơ anun tal nao ĕp lăng tong ten anai, djru kơ bruă ngă pơtruh nao rai, sa tơhnal pơtrun yom pok brơi tơlơi gêh găl kơ ƀing ngă bruă sĭ mơdrô, mơnuih dêh čar ta dŏ pơ tač rơngiao hyu čuă ngui, ĕp lăng amăng tơring čar laih anun tuh pơ alin. Ơi Steve Bùi lăi:

“Ƀing gơmơi ăt ƀuh rơđah mơ̆n tơring čar Lâm Đồng lĕ anih pơhưč lu mơnuih tuh pơ alin prăk kăk sĭ mơdrô, jơlan hơdră mă bruă djơ̆ tơlơi phiăn, tơpă hnong, ngă gêh găl đut tơhnal kơ mơnuih ngă bruă sĭ mơdrô amăng dêh čar hăng tač rơngiao nao pơ tơring čar.

 Čang rơmang lĕ tal hyu ĕp lăng anai ƀing gơmơi hơmâo bruă ngă hrom tong ten amăng bruă djru nao rai tơlơi pơhing, dưi ruah mă tơring glông Lạc Dương ngă anih tuh pơ alin blung a ƀơi Lâm Đồng”.

Hăng tơlơi ngă khut khăt mơ̆ng tơring čar ba glăi hơdôm jơlan hơdră, tơlơi đăo kơnang kơ ƀing ngă bruă tuh pơ alin sĭ mơdrô, Lâm Đồng anăp nao kơ bruă mă phara, kơtang hloh pơtrut bơwih ƀong huă kơnang kơ anŏ gêh găl mơ̆ng pô, ngă tui tơhnal pơkă pơđĭ kyar bơwih ƀong huă mơnuih mơnam hơđong kjăp.

Nay Jek: Pơblang