VOV4.Jarai-Hơdôm hrơi hăng anai, tơlơi arăng hyu ĕp mă gơnam amăng gŭ lŏn giăm să Tà Nung, plơi prong Đà Lạt hăng să Mê Linh, tơring glông Lâm Hà, Lâm Đồng pơphun pơhaih ba mơtam. Lu anih ƀơi kơdư čư̆ ber ƀiă arăng čoh kuai, klơi lŏn plŭk plăk, kiăng mă pơtâo, lơ̆m anun khua mua gong gai kơnuk kơna să ƀu pơđing nao ôh laih anun ƀu anăm pơgăn lơi. Tơlơi lăp kiăng lăi lĕ rơnuč thun hlâo, Jơnum min mơnuih ƀôn sang tơring čar Lâm Đồng hơmâo ngă hră pơtrun brơi bơkơhmal lu sang bruă sĭ mơdrô hyu mă gơnam amăng gŭ lŏn ča čot, samơ̆ tơlơi anai ăt dŏ đôč.

Nao pơ kual đang rơ̆k glăr, gah plơi thôn 4, să Tà Nung, plơi prong Đà Lạt lơ 10/5, ƀuh mơtam ƀơi hơdôm kơdư amăng glai, anih arăng čoh kuai, klơi luh hip hup, črek blah pơrơkă pơrơkưng pơtâo pioh mă pơtâo man pơdong. Hơdôm bruă ngă anai soh hăng tơlơi phiăn samơ̆ mă bruă pơhaih ba mơtam ƀu pơdŏp kơ hlơi ôh. Ƀing kông ñơn dŏ mă bruă pơ anun arăng apah mă bruă brơi thâo, hrơi blan rơgao, sui ha wơ̆t hơmâo khua mua mơ̆ng să mut nao rai, samơ̆ bruă arăng kuai mă boh pơtâo gơñu ăt mă bruă đôč.

Anih mă gơnam gŭ lŏn ča čot ƀơi să Tà Nung-Đà Lạt

Bơ ơi Phan Quang Trung, dŏ pơ grup 14, thôn 4, să Tà Nung, arăng lăi ñu yơh pô pơphun brơi mă boh pơtâo ča čot amăng kual anun, yua kơ ƀu hơmâo bruă mă laih anun ƀu hơmâo mơnuih tơgŭ kơđi ƀom kiơng ñu anun yơh ñu mă boh pơtâo čo čot.

“Arăng ƀu brơi ngă ôh samơ̆ ta ăt ngă đôč laih anun ƀu ƀuh arăng ƀom kiơng hơgĕt lơi, ta lăi tơpă tui anun yơh. Khua mua să hơdôm wơ̆t laih rai mă rơdêh, giong pơsir brơi glăi mơ̆n rơdêh ta. Lăi jăng jai pơdơi, samơ̆ pơdơi lĕ ta ƀu thâo ngă bruă hơgĕt dơ̆ng lơi anun khom kuai mă boh pơtâo yơh či mă bruă"”

Laih nao tơña hơduah kiăng thâo, rơngiao kơ mă boh pơtâo črek, tơlơi arăng blah kơdư čư̆, klơi lŏn pioh khuer mă boh pơtâo, mă čuah ča čot amăng kual ăt tơket tơkeng đôč. Tui hăng ơi Liêng Hot Quil, mơnuih mă bruă pơkă lŏn tơnah-bruă hmua, man pơdong-anih hơdip jum dar să Tà Nung, hơdôm ƀing mă pơtâo čuah anun, kah hăng gơñu thâo hlâo, sit nao ĕp, anun yơh gơñu đuăi dŏp hlâo laih:

“Tơnap biă mă rĭm wơ̆t adơi ayong trun nao ĕp lĕ gơñu thâo hlâo laih, kah hăng gơñu dŏ krăp lui pơ anai mơtam. Lơ̆m ta trun nao ĕp lăng gơñu thâo, laih anun gơñu ngă mă pơdơi abih laih bruă mă”.

Bơ tui hăng ơi Kră Jăn Ha Djiêp, Kơ-iăng Khua să Tà Nung, plơi prong Đà Lạt, hlâo kơ anun, să lu wơ̆t laih ngă hră bơkơhmal đŭ prăk ƀing mă boh pơtâo ča čot amăng kual kơdư đang rơ̆k glăr anai, samơ̆ pơsir giong lĕ, tơhan kơnuk kơna đuăi mơ̆ng anun, dik dăk gơñu glăi mă bruă mă boh pơtâo dơ̆ng yơh. Tơlơi anai ngă suek ruă akŏ hlao biă mă mơ̆ng khua mua gong gai kơnuk kơna să plơi pla.

“Tơnap tap mơ̆ng khua mua să lĕ pơsir gleh glar đơi. Pơsir giong, sa dua wơ̆t hrơi tơjuh tơdơi kơ anun gơñu mut nao mă bruă dơ̆ng. Lăi tơpă, gơmơi ngă bruă khut khăt laih, mơnuih pơkŏn lĕ gơmơi ƀu thâo ôh. Anai neh hơdôm pok hră pơar anai, gơmơi pơsir hơdôm wơ̆t laih, lu wơ̆t laih”.

Anih mă gơnam amăng gŭ lŏn ča čot ngă dlưh lŏn ƀơi Lâm Đồng

Tui hăng hră pơar mơ̆ Jơnum min mơnuih ƀôn sang să Tà Nung brơi lăng, hră pơtrun bơkơhmal tơlơi soh hăng đŭ prăk yua hyu mă gơnam amăng gŭ lŏn ča čot phrâo anai ƀơi đang rơ̆k glăr lĕ lơ 5/1/2021. Tui anun, rơbêh 5 blan tơdơi kơ anun, bruă ĕp lăng, pơsir bruă hyu mă boh pơtâo ča čot amăng kual anai ƀu hơmâo wai lăng tong ten ôh; bruă arăng mă gơnam amăng gŭ lŏn ča čot pơ anai jai hrơi pơhaih ba mơtam hăng ngă hơdơ̆ kiăng.

Ƀơi kual jĕ guai să Tà Nung, plơi prong Đà Lạt hăng să Mê Linh, tơring glông Lâm Hà, ră anai hơmâo boh ƀiă 4 bit anih arăng mă boh pơtâo man pơdong sang lu biă mă. Amăng anun, hơmâo anih mă boh pơtâo, bơbeč truh anih ngă hmua pla pơjing.

Tui hăng mơnuih ƀôn sang amăng kual bruă mă boh pơtâo man pơdong ča čot pơ anai hơmâo mơ̆ng lu thun rơgao laih, ngă bơblih hĭ lŏn glai čư̆ siăng kriăng pơtâo laih anun amra hơmâo tơlơi ngă lŏn tơhlŏm dlưh mơ̆ng čư̆ hơjan prong. Bruă pơdŭ pơgiăng boh pơtâo mut tơbiă mơ̆ng luh mă pơtâo anai ăt hlăk jing tơlơi hŭi ƀu rơnuk rơnua nao rai ƀơi jơlan glông, ngă răm jơlan mơnuih ƀôn sang pơčruh prăk čuk pơkra mă.

Hlâo kơ anun, Jơnum min mơnuih ƀôn sang tơring čar Lâm Đồng hơmâo ngă lu hră git gai djop anom bruă kơnuk kơna kơtưn wai lăng, ĕp rơđah bruă mă gơnam gŭ lŏn, khom pơsir khut khăt hơdôm sang bruă, mơnuih ngă soh, mă gơnam amăng gŭ lŏn ča čot.

Lơ 17/12 thun hlâo, Jơnum min mơnuih ƀôn sang tơring čar Lâm Đồng ăt ngă hră pơtrun bơkơhmal tơlơi soh đŭ prăk 5 boh sang bruă sĭ mơdrô amăng bruă mă boh pơtâo, mă gơnam gŭ lŏn hăng lu tơlơi soh glăi kah hăng: Kông ty mơnuih ƀôn sang ngă pô Hưng Nguyên, Kông tymơnuih ƀôn sang ngă pô Hà Thanh, Kông ty mơnuih ƀôn sang ngă pô man pơdong sĭ mơdrô hăng bơwih bơwăng Hà Hưng, Kông ty pơčruh ngăn tuh pơ alin hang mă gơnam gŭ lŏn Đức Phú, Kông ty pơčruh ngăn Minh Định.

Rơnoh prăk đŭ yua tơlơi ngă soh Jơnum min mơnuih ƀôn sang tơring čar Lâm Đồng pô đŭ laih anun ba duh glăi  kơ kơnuk kơna truh 5 klai 300 klăk prăk. Tui anun mơ̆n, tơlơi arăng mă bruă hyu mă boh pơtâo, gơnam amăng gŭ lŏn ča čot ăt dŏ hơmâo đôč ƀơi anih ha mơguah să Tà Nung, plơi prong Đà Lạt hăng să Mê Linh, tơring glông Lâm Hà.

Quang Sáng-Pô čih: Nay Jek pơblang