VOV4.Jarai - Mơguah lơ 17/5, Jơnum min mơnuih ƀôn sang tơring čar Lâm Đồng hmâo hră pơ-ar tŭ ư hơdră pơtrun kơ čơđai sang hră, čơđai gưl dlông hơdôm bôh sang hră ƀơi tơring čar pơphun dong bruă pơplông tal dua thun hrăm amăng 3 hrơi hăng khom ngă giong hlâo kơ lơ 21/5 pơ̆ anăp. Hluai tui tơlơi rơkâo mơng Gơnong bruă pơtô pơhrăm tơring čar Lâm Đồng, Jơnum min mơnuih ƀôn sang tơring čar Lâm Đồng tŭ ư hrom brơi čơđai sang hră, ƀing hrăm gưl dlông akă pơplông giong tal 2 thun hrăm pơphun pơplông amăng hơdôm hrơi lơ 19, 20 hăng lơ 21/5; hơdôm čơđai pơkon pơdơi hrăm dong. Pơđut tal pơplông anai, ƀing čơđai sang hră, ƀing hrăm gưl dlông ƀơi tơring čar pơdơi hrăm dong kiăng pơgang pơgăn klin Covid-19.

Hăng čơđai sang hră anih 12, Jơnum min mơnuih ƀôn sang tơring čar rơkâo Gơnong bruă pơtô pơhrăm tơring čar pơtô brơi pơphun hrăm tơlơi pơplông mă ƀăng gưl 3 hăng hơdră lăng nao rai amăng tivi. Kơnong hơdôm anih anom tơnap tap, kual djuai ania ƀiă, ƀu hmâo tơlơi gal anom mă yua, hơdră măi mok kiăng hrăm tơlơi pơplông lăng nao rai amăng tivi thơ amra pơphun hrăm tơlơi pơplông hơbit samơ̆ khom agaih rơnak, pơdjai kơman ƀơi sang hră, anih hrăm, măi yua, gơnam yua pơtô pơhrăm hlâo kơ čơđai sang hră nao pơ̆ sang hră, ƀu tum pơƀut hơbit rơgao kơ 30 čô čơđai sang hră sa bôh anih hăng gôm adung mơbah, pơdjai kơman, lăi pơthâo tơlơi suaih pral, dô̆ čơlah ataih nao rai, pơhlôm hơdôm tơlơi pơkă kơ pơgang pơgăn klin./.

Siu H’ Prăk: Pô pơblang