VOV4.Jarai - Yua kơ pơmĭn gong gai ƀon lan glăk đing nao bruă pơgang klin Covid-19 hăng prap lui tal plĕ hră ruah khua mua, bruă mă lŏn, pơtâo ča čot glăk ƀuh lu ƀơi să Hiệp An, tơring glông Đức Trọng (Lâm Đồng). Ƀu hŭi ôh, ƀing gơñu mă amăng mlăm laih dong rơnuč rơwang hrơi tơjuh, bruă mă lŏn, pơtâo ča čot pơphun ƀơi anăp, đa anih giăm anom bruă Jơnum min mơnuih ƀon sang să hơdôm rơtuh met đôč.

Ƀơi kual lŏn ngă hmua  mrô 281, hră lơkak 6A giăm đang kyâo hngo mơtah mơda, hơdôm pluh rơbâo khối lŏn, pơtâo hơmâo sa anom bruă mă ča čot, pơdŭ pơgiăng nao pơ kual pơkŏn sĭ mơdrô. Sit biă ñu, bruă mă lŏn pơphun lu biă mă, ngă kơ kual anai jing anih mă lŏn, pơtâo pơprong. Lơ̆m ƀing gơmơi kê nao tơña, hơdôm rơbêh pơprong, măi khuer pơtâo hăng lu mơnuih mă bruă luh đuăi mơng anih mă bruă yua hŭi. Laih anun, ƀơi anih dŏ kơnong sa boh măi klơi lŏn prong ƀu hơmâo mơnuih mơgăt.

Sa anih mă lŏn, pơtâo ča čot ƀơi să Hiệp An

Anih mă lŏn, pơtâo ča čot anai ƀuh sui hơdôm blan laih rơgao, giăm plơi pla mơnuih ƀon sang, ataih mơng anom bruă Jơnum min mơnuih ƀon sang să aka ƀu truh 2 km, samơ̆ gong gai ƀon lan să Hiệp An kơnong phăk prăk 1 wŏt đôč kiăng bơtơhmal amăng lơ 27/4. Ơi Uông Thanh Hải, mơnuih apăn bruă wai lăng gah lŏn mơnai să Hiệp An brơi thâo, yua ƀu ƀuh hmao tlâo hơdôm bruă ngă soh lĕ yua ƀing gơñu mă klĕ, lơ̆m ƀing apăn bruă amăng să pơčlah hăng hơmâo lu bruă pơkŏn.

Anom bruă dŏ ƀiă mơnuih yua anun ƀu dưi wai lăng na nao hăng ĕp ƀuh hmao tlâo bruă arăng kuăi mă lŏn, khuer mă pơtâo ča čot. Sit biă ñu anai lĕ bruă tơnap tap brơi ƀing gơmơi. Hrŏm hăng anun, lơ̆m ƀing gơmơi nao pel ĕp, rơdêh, măi mok ƀing gơñu ba đuăi yơh, ƀu dưi mă tơl tơngan ăt ƀu dưi phak bơtơhmal kơ bruă mă lŏn, pơtâo ča čot anai.

Hơđôm pluh rơbâo khối lŏn, pơtâo pơdŭ pơgiăng đuăi mơng anai

Ƀing mơnuih wai lăng săl yua ƀu hmao thâo, samơ̆ ƀơi anih pơkŏn giăm jơlan mrô 20, ataih mơng Jơnum min mơnuih ƀon sang să Hiệp An hơdôm rơtuh met ăt ƀuh kar kăi mơn. Lu rơdêh wuăi lŏn tui hluai kiăng, khuer mă pơtâo ča čot amăng tơhrơi mơtăm samơ̆ gong gai ƀon lan ngă amưng. Lơ̆m ƀing gơmơi pơdah brơi rup phĭn hăng tơña, anih kuăi mă lŏn, pơtâo anai hơmâo hră pơsit hă ƀŭ, Khua Jơnum min mơnuih ƀon sang să Hiệp An kah mơng pơkiăo nao mơnuih pel ĕp tơlơi ngă soh hăng ngă hră pơ-ar phak prăk.

Ơi Hồ Hữu Hiếu, Khua Jơnum min mơnuih ƀon sang să Hiệp An pơsit tong, gong gai să ƀu ngă amưng ƀudah pơtah tai, ƀu khin pơgăn hĭ bruă arăng kuăi mă lŏn, pơtâo ča čot. Ñu brơi thâo, ba truh tơlơi anai yua să prong, kual lŏn ataih, asuek, ƀing wuăi mă lŏn, pơtâo amăng hơdôm hrơi pơdơi, mơmŏt mlăm yua anun ngă tơnap tap. Samơ̆ ơi Hồ Hữu Hiếu ăt brơi thâo, să amra khut khăt pơsir hĭ bruă anai.

Rơdêh kuăi lŏn, pơtâo ča čot aka ƀu hmao ba đuăi mơng anai

Amăng hrơi blan laih rơgao, Jơnum min mơnuih ƀon sang să hơmâo pơsir hĭ lu tơlơi ngă soh. Samơ̆, yua să Hiệp An prong, đa kual ataih, asuek, arăng kuăi mă lŏn, khuer mă pơtâo amăng hrơi pơdơi, mơmŏt mlăm. Pơ anăp anai, să Hiệp An amra khut khăt pơsit hĭ bruă ngă soh, pơhlôm ƀu brơi kuăi mă lŏn, kah hăng khuer mă pơtâo ča čot amăng să.

“Amra pơsir hĭ khut khă” kiăng kơ pơhlôm hơđong, lĕ tơlơi ƀuăn mơng khua mua să Hiệp An, tơring glông Đức Trọng, tơring čar Lâm Đồng ăt brơi ƀuh, hlâo anun să wai lăng aka ƀu kjăp. Hăng tơlơi anai ba truh arăng mă lŏn, pơtâo ča čot ƀơi anai, ƀuh ƀơi anăp mơta mơtăm ƀu hŭi arăng jăm ƀuah hăng tơlơi phiăn.

Siu Đoan: Pơblang