VOV4.Jarai - Jơnum bơkơtuai tal 3 kiăng ruah mă, čih anăn hơdôm mơnuih mơng ƀirô, khul grŭp, anom bruă mơng Kơnuk kơna djop tơhnal pơkă tơbiă anăn kơ khua pơ ala mơnuih ƀôn sang tal 15 pơphun amăng mơguah anai, lơ 16/4, ƀơi Hà Nội. Bruă jơnum bơkơtuai tal 3 anai yua kơ Khul Khua Jơnum min djop djuai ania mơnuih mơnam dêh čar Việt Nam iâu pơƀut jơnum, git gai kiăng ruah mă, čih anăn ƀing mơnuih hmâo djop tơhnal pơkă tơbiă anăn kơ Khua pơ ala mơnuih ƀôn sang gah dêh čar. Bruă jơnum bơkơtuai, ruah mă čih anăn ƀing mơnuih djop tơhnal pơkă tơbiă anăn kơ Khua pơ ala mơnuih ƀôn sang dêh čar ta. Tơdah ƀu hmâo tơlơi pơkôl thơ bruă jơnum pơsit hăng hơdră yơr tơngan ƀudah plĕ hră hơgom. Tui hăng tơlơi pơkă, kaih hloh lĕ lơ 23/4/2021 (30 hrơi hlâo kơ ruah khua), Grŭp apăn bruă Jơnum min djop djuai ania mơnuih mơnăm dêh čar Việt Nam mơ-ĭt hră pơ-ar Jơnum bơkơtuai tal 3 hăng hră čih anăn ƀing mơnuih djop tơhnal pơkă tơbiă anăn dưi hmâo Grŭp Khua Jơnum min djop djuai ania mơnuih mơnam dêh čar Việt Nam lăi pơthâo tơbiă anăn kơ Khua pơ ala mơnuih ƀôn sang dêh čar truh kơ Khul wai lăng bruă ruah khua lŏn ia ta hăng Jơnum min apăn bruă Khua pơ ala mơnuih ƀôn sang dêh čar ta./.

Siu H’ Prăk: Pô pơblang