VOV4.Jarai - Tlam lơ 8/4, mông jao bruă kơ Khua dêh čar phrâo pơphun ƀơi Ƀirô Kơnuk kơna, mông jao glăi bruă kơplah wah Khua dêh čar ơi Phạm Minh Chính hăng Khua mir sir dêh čar ơi Nguyễn Xuân Phúc - Khua dêh čar hơđăp hăng lăi pơthâo tơlơi pơsit ruah pơhrua 2 čô kơ-iăng khua dêh čar hăng sa, dua čô khua ding jum, ding kơna pơkŏn dong amăng Kơnuk kơna rơwang mă bruă thun 2021-2026. Đĭ pơhiăp amăng mông ngă lơphet, Khua mir sir dêh čar ta ơi Nguyễn Xuân Phúc pơpŭ kơ Khua dêh čar phrâo ơi Phạm Minh Chính, ƀng kơ-iăng khua dêh čar, khua ding jum, khua gơnong bruă phrâo hơmâo arăng ruah đĭ apăn bruă.

Khua mir sir dêh čar ta ơi Nguyễn Xuân Phúc hăng Khua dêh čar ơi Phạm Minh Chính ƀơk bơnga brơi ding kơna Kơnuk kơna rơwang thun 2016-2021

Laih dong pơdah pran pơpŭ bơni Ding jum kơđi čar, Khul khua čih pioh, Khul apăn bruă Ping gah, Khua pơ ala mơnuih ƀon sang dêh čar, Jơnum min djop djuai ania mơnuih mơnam Việt Nam, laih dong hơdôm anom bruă hăng abih bang mơnuih ƀon sang hơmâo djru brơi, ngă hrŏm, ngă gêh gal hăng dong yua kiăng Kơnuk kơna mă bruă rơwang thun 2016-2021 dưi ngă pơgiong bruă hơmâo ba tơbiă; lăng yôm hơdôm tơlơi gir run prong prin, abih pran jua djru brơi lŏn ia, mơnuih ƀon sang, pơgôp ngă truh kih amăng bruă Kơnuk kơna amăng 5 thun laih rơgao; ba lŏn ia ta hrưn đĭ sa yak yôm phăn.

Siu Đoan: Pơblang