VOV4.Jarai - Hơdôm blan rơgao, mơnuih ƀôn sang ngă đang hmua 2 bơnah hang ia krông Đa Nhim, črăn găn să Lạc Xuân, tơring glông Đơn Dương (Lâm Đồng) tơnap tap yua kơ ia pruih glut hlŭ khŭ đơi. Hmâo laih đang añăm lui ruh yua kơ khom pruih ia hlŭ tơbiă rai mơng bruă hyu mă čuah.

Khă hmâo prăp lui djop laih tơlơi kiăng pioh ngă đang añăm salat phrâo, samơ̆ rơbêh kơ 10 hrơi rơgao, sang anô̆ amai Nguyễn Thị Lành, ƀơi plơi Diom B, să Lạc Xuân, tơring glông Đơn Dương ăt djưng djư mơn, ƀu khin pla añăm pơtăm ôh huĭ kơ lŭp lăp. Bôh than ba truh lĕ yua kơ ia pruih kơ añăm pơtăm mơng ia krông Đa Nhim khŭ đơi, djơ̆ anô̆ hă kah hăng ia glut yua kơ bruă hyu mă čuah lu mơng sa anom bruă đam ƀơi tơkai ia krông. Tui hăng amai Lành, bruă pla añăm mơtah djop mơta, biă ñu lĕ añăm hơbơi anum, salat, añăm hơbơi hla rui.. kiăng hmâo ia khom pơhlôm, tơdah pruih ia hlŭ, ia khŭ hăng hmâo hlŭ lŏn hă kah hăng lui lơi đôč yơh, răm rai prong biă.

“Prăp lui bơyan pla anai lĕ 1,3ektar đang salat hlao, samơ̆ tơdah ia khŭ tui anai añăm hla rok anai amra răm rai. Pla añăm salat sit mơng 2 truh 3 rơwang hrơi tơjuh lĕ pơphun lôm hla glăi laih, tơdah pruih ia anai thơ añăm amra jŭ tĭt, ƀing gơmơi glăi rơngiă pưh tơngan”.

Kual mă čuah ƀơi ia krông Đa Nhim mơng Sang bruă bơwih ƀong mơnuih ƀôn sang Lê Văn Oai Lâm Đồng 

Bruă hyu mă čuah ngă ia krông Đa Nhim khŭ kôl, bơbeč truh prong bruă ngă đang hmua mơng lu mơnuih ƀôn sang ƀơi anai. Tui hăng yă Phan Thị Cấp, ƀơi plơi La Bouye A, să Lạc Xuân, khă ia ƀu pơhlôm samơ̆ mơnuih ƀôn  sang ăt pruih kơ phun pla mơn, yua kơ ƀu hmâo ia mă mơng hơpă dong tah. Hmâo laih lu đang añăm pơtăm răm rai, phun pla kaih bluh đĭ hăng brô̆ prong yua kơ ia pruih khŭ kơtang đơi. Tơdah tơlơi anai dô̆ sui mơn thơ amra ngă mơnuih ƀôn sang bưp tơnap prong biă, amăng anun hmâo sang anô̆ ñu.

“Pla añăm hơbơi anum mơ̆ pruih ia khŭ thơ amăng lăm hmâo asar jŭ, tơnap tui anun lah. Lăi hrom, tơlơi hơdip ƀơi ia krông Đa Nhim anai kơnong kơ gơnang kơ ia mơng ia krông Đa Nhim đôč. Bơyan hơjan lĕ ia ling dăo abih ƀhiao, bơ̆ bơyan anai đing nao ngă đang hmua thơ ƀu hmâo ia pruih ôh”.

Mơnuih ƀôn sang bơngot yua kơ ia krông hơƀak, khŭ, bơbečh truh bruă ngă đang hmua

Đa Nhim lĕ ia krông prong rô găn rơgao lu bôh să, tơring kual gah tơring glông Đơn Dương hăng sa črăn mơng tơring glông Đức Trọng, anih pơsir ia pruih gơgrong hlâo kơ bruă đang hmua ƀơi kual phun mơng tơring čar Lâm Đồng. Tơlơi lăp lăi lĕ, hơdôm hrơi anai lĕ bơyan phang, mrô ia ƀơi ia krông Đa Nhim ƀu lu samơ̆ anom hyu mă čuah Sang bruă bơwih ƀong mơnuih ƀôn sang Lê Văn Oai Lâm Đồng (pơdŏng ƀơi tơring glông Đơn Dương) hmâo iâu pơhrui laih 2 bôh ƀat tô prong kiăng hrip mă čuah. Ia glut hlŭ ƀu hmâo pơsir mơng anom anai pơđoh tơbiă ƀơi ia krông, ngă ia krông jai hrơi jai khŭ hlŭ, tơpluk.

Dưi thâo, Sang bruă bơwih ƀong mơnuih ƀôn sang Lê Văn Oai Lâm Đồng dưi hmâo tơring čar Lâm Đồng pơsit brơi mă čuah ƀơi anai rơbêh kơ 11 ektar, anun lĕ rôk tui sa črăn ia krông Đa Nhim hmâo rơwang ataih giăm truh 6km. Hơdôm hrơi pơphun mă čuah lĕ lơ 30/11/2020 hăng rơwang pơkă truh 14 thun 5 blan. Ơi Hoàng Công Hiếu, Khua Anom wai lăng kông ngăn lŏn mơnai hăng rơhuông adai tơring glông Đơn Dương brơi thâo, bruă sang bruă anai hyu mă čuah ngă bơbeč truh akô̆ ia, bơdjơ̆ nao bruă ngă đang hmua mơnuih ƀôn sang lĕ hmâo sit. Amăng hơdôm hrơi pơ̆ anăp, tơdah tơlơi anai dưi gah anom bơwih ƀong hơkrŭ pơsir giong thơ amra khom pơdơi jăng jai bruă mă čuah anai.

“Lom mă čuah khom pơhlôm anô̆ klă akô̆ ia kơ mơnuih ƀôn sang pioh kơ bruă đang hmua. Khă hnun hai, truh mông anai, rơgao kơ tơlơi lăi pơthâo mơng mơnuih ƀôn sang lĕ anô̆ klă mơng ia pruih ăt ƀu pơhlôm mơn. Yua anun, pơ̆ anăp anai, tơring glông hrom hăng Anom wai lăng kông ngăn lŏn mơnai hăng rơhuông adai amra hmâo tơlơi pel ĕp, lăng tui dong laih anun rơkâo pô anom bơwih ƀong khom hơkrŭ pơsir abih. Tơdah ƀu hơkrŭ pơsir thơ amra brơi pơdơi hĭ bruă mă čuah mơng ơi Lê Văn Oai”.

Ƀu djơ̆ kưnong kơ ia khŭ, lu črăn hang ia hmâo gru nam lŏn tơhlom

Ƀu djơ̆ kơnong kơ ia yua ƀu hơdjă đô̆č ôh mơ̆, bruă mă čuah mơng  Sang bruă bơwih ƀong mơnuih ƀôn sang Lê Văn Oai Lâm Đồng hmâo ngă laih lu črăn hang ia krông Đa Nhim tơhlom trun, ngă bơdjơ̆ nao prong lŏn tơhlom amăng bơyan hơjan ia ling dăo pơ̆ anăp anai. Rơngiao kơ anun, lom mă čuah, sang bruă anai rŏng bư̆ mă bơnư̆ kŏng ia, hrom hăng anun akă ngă tui djop hơdôm tơlơi pơkôl pơkă mơng tơlơi phiăn, amăng anun hmâo bruă ƀu ngă tui dưm truă anih pơkă lăng ƀơi anih mă tơbiă čuah, ƀu dưm truă camera ƀơi kual dưm čuah pioh djă lui tơlơi pơhing...

Quang Sáng: Pô čih – Siu H’ Prăk: Pô pơblang