VOV4.Jarai - Mơguah lơ 28/4, ƀơi Hà Nội, Anom bruă Nội chính Ping gah gơnong dlông (anom pơphô bruă čar) pơphun Jơnum abih lăi pơthâo khŏm ngă Tơlơi pơtrun Jơnum Ping gah dêh čar tal 13 kơ bruă gah bruă kơđi čar, pơgang hưp ham ƀong ngăn drăp kơnuk kơna hăng pơplih tơlơi phiăn, pơphun pơplông tui akŏ bruă Kơđi čar Ping gah rơwang thun 2021-2025. Kiăo tui hơdôm tơlơi hơmâo lăi nao amăng Hră pơtrun, mông Jơnum ngă rơđah hơdră pơsir yôm phun amăng bruă čar, pơgang hưp ham ƀong kông ngăn, pơplih tơlơi phiăn hơmâo lăi nao amăng tơlơi pơtrun Jơnum Ping gah dêh čar tal 13. Pơhiăp ƀơi mông Jơnum, ơi Phan Đình Trạc, Khua anom bruă Nội chính lăi rơđah: hăng 7 mơta bruă mă, hơdră pơsir, jơlan hơdră ngă bruă mơng Anom bruă pơphô bruă kơđi čar mơng Ping gah ngă tui Tơlơi pơtrun Jơnum Ping gah tal 13, kiăo tui, pơsit brơi hơdôm tơlơi pơmin, tơlơi gơñăm nao, hơdră ngă bruă mơng Tơlơi pơtrun Jơnum ping gah dêh čar tal 13 kơ bruă kơđi čar, pơgang pơgăn hưp ham ƀong kông ngăn hăng pơplih tơlơi phiăn. Ƀơi mông jơnum, Anom bruă Nội chính gơnong dlông pơphun pơplông kiăo tui akŏ bruă: “hơmâo ƀuh hăng pơphô bruă kơ ping gah pơsir hĭ djŏp tơlơi soh hưp ham ƀong kông ngă; git gai pơphô bruă, pơsir hĭ hơdôm bruă tơnap, hmư̆ hing kơ rơnuk rơnua ƀơi anih dŏ”.

Siu H’Mai: Pơblang