VOV4.Jarai-Tlam lơ 22/4, mă bruă hăng khua mua Jơnum min Prăk kăk, Ngăn drăp mơ̆ng Sang bruă khua git gai pơ ala mơnuih ƀôn sang dêh čar, ơi Vương Đình Huệ, Khua git gai pơ ala mơnuih ƀôn sang dêh čar rơkâo, ngă giong hơdră čih pơkra tơlơi phiăn kiăng ngă atur gêh găl sa hnong bơblih phrâo, pơđĭ tui anŏ tŭ yua wai lăng prăk kăk, ngăn drăp kơnuk kơna.

Ƀơi mông mă bruă, Khua git gai pơ ala mơnuih ƀôn sang dêh čar ta, ơi Vương Đình Huệ rơkâo Jơnum min Prăk kăk, Ngăn drăp sem lăng, pơtong sit tơlơi pơhing hlâo kơ pơtong glăi bruă mă yua Jơnum min pơpha bruă, git gai bruă sem lăng rơnoh prăk kăk, ngăn drăp, jŭ yap rơnoh prăk mă yua kơ bruă mă. Blung hlâo lĕ, lăi pơthâo pơtong glăi ngă tui mă yua prăk kăk amăng dêh čar 6 blan akŏ thun anai;

Hră lăi pơthâo pơhrua dơ̆ng rơnoh prăk mơ̆ng gơnong dlông thun 2021 kơ djop Hơdră dêh čar pơtrun ngă; Kơčăo bruă čih Hră pơtrun tơlơi phiăn mă bruă, tơhnal pơkă hăng rơnoh prăk pơpha prăk yua re se amăng bruă kơnuk kơna thun 2022. Khua git gai pơ ala mơnuih ƀôn sang dêh čar rơkâo Jơnum min Prăk kăk, Ngăn drăp pơphun brơi grup nao ĕp lăng, pơtong glăi na nao bơwih brơi bruă pơtong rơđah boh yom phun pơdah đĭ hăng khua mua pơ ala mơnuih ƀôn sang dêh čar jơnum lok sa hăng lok 2, tal 15 pơ anăp.

Nay Jek: Pơblang